लॅटफॉर्म एकवर ‘ऑटो टू कोच’

म. टा. विशेष प्रतिनिधी, नागपूर

नागपूर स्थानकावर होम प्लॅटफॉर्मवर ‘कार टू कोच’ सुविधा आहे मात्र ‘ऑटो टू कोच’ असा नवीनच प्रकार गुरुवारी सकाळी प्लॅटफॉर्म क्रमांक १ वर पाहायला मिळाला. या प्रकारामुळे रेल्वे स्थानकावरील सुरक्षा व्यवस्थेवरच प्रश्नचिन्ह लागले आहे.

रेल्वे स्थानकावर संत्रा मार्केटच्या बाजूने प्लॅटफॉर्म क्रमांक आठ आहे. या ठिकाणी अगदी प्लॅटफॉर्मच्या बाजूला कारने किंवा आपल्या वाहनाने जाता येते. अर्थात येथेही प्लॅटफॉर्मच्या बाजूला जाता येते, पण प्लॅटफॉर्मवर आपले वाहन नेता येत नाही. पण शुक्रवारी सकाळी प्लॅटफॉर्म क्रमांक १ वर ऑटो धावताना पाहून अनेकांना आश्चर्य वाटले. प्लॅटफॉर्म हा फक्त प्रवाशांसाठी आहे. त्यावरून कोणतेही वाहन चालविणे नियमाच्या विरुद्ध आहे. तरीही गुरुवारी सकाळी ६.३०च्या सुमारास लाल रंगाचा एक तीन चाकी ऑटो रेल्वे स्थानकावर आला. आरीपएफ ठाण्याच्या बाजूला असलेल्या मार्गातून तो प्लॅटफॉर्म क्रमांक १ वर आला. यावेळी प्लॅटफॉर्मवर नागपूर - भुसावळ पॅसेंजर उभी होती. अनेक प्रवाशी या प्लॅटफॉर्मवर होते. हा ऑटो प्लॅटफॉर्मवर ‘इटारसी एन्ड’ला गेला व तेथून मग ‘मुंबई एन्ड’ला आला आणि मग मुख्य प्रवेशव्दारातून बाहेर पडला. पण त्याच्या या प्रवासात त्याला कोणीही हटकले नाही. सध्या सणासुदीमुळे सर्वत्र पोलिस बंदोबस्त आहे. अशा परिस्थितीत एखादा ऑटो प्लॅटफॉर्मवर येतो आणि आपले काम करून निघून जातो, याबद्दल आश्चर्य व्यक्त होत आहे.