म.टा.विशेष प्रतिनिधी,नागपूर
महाराष्ट्र व गोवा बार कौन्सिलचे माजी अध्यक्ष अॅड. आसिफ कुरेशी यांचे वक्फ मंडळावरील सदस्यत्व कायम ठेवण्याबाबत मुंबई हायकोर्टाच्या नागपूर खंडपीठाने दिलेल्या निर्णयाला सर्वोच्च न्यायालयात आव्हान देण्यात आले आहे.
मोहम्मद मेहबूब शेख यांनी दाखल केलेल्या विशेष अनुमती याचिकेवर सुनावणी करताना न्या. अरुण मिश्रा आणि न्या. अमितवा रॉय यांच्या खंडपीठाने अॅड. आसिफ कुरेशी, राज्य सरकार आणि इतर प्रतिवादींना नोटीस बजावली असून त्यावर उत्तर सादर करण्याचा आदेश दिला आहे.
याचिकाकर्त्यानुसार, नागपूर हायकोर्टाने २२ डिसेंबर रोजी दिलेल्या निकालात अॅड. आसिफ कुरेशी यांनी दाखल केलेल्या याचिकेला अंशतः मान्य करून कुरेशी यांचे वक्फ मंडळावरील सदस्यत्व कायम ठेवले. महाराष्ट्र व गोवा बार कौन्सिलचे अध्यक्ष म्हणून अॅड. कुरेशी यांचा कार्यकाळ १ डिसेंबर २०१५ रोजी संपुष्टात आला होता. त्यामुळे कुरेशी यांचे वक्फ मंडळावरील सदस्यत्व देखील त्याच तारखेला संपुष्टात आले, असे परिपत्रक राज्य अल्पसंख्यक विकास विभागाच्या सचिवांनी २६ जून २०१६ रोजी काढले होते. ते परिपत्रक नागपूर हायकोर्टाने रद्द केले. त्यासोबतच हायकोर्टाने वक्फ मंडळाच्या अध्यक्षपदाची निवडणूक देखील रद्द केली. दरम्यान, सदर निकालाला चार आठवडे स्थगित करावे, अशी विनंती करण्यात आली होती. त्यामुळे याचिककार्त्याने सर्वोच्च न्यायालयात धाव घेतली.
याचिकाकर्त्याच्यावतीने वरिष्ठ अधिवक्ता हरिश साळवे, अॅड. आर.के. अडुसरे आणि अॅड. आनंद लांडगे यांनी तर कुरेशी यांच्यावतीने वरिष्ठ अधिवक्ता सलमान खुर्शीद, अॅड. निखिल पाध्ये सत्यजित व अनघा देसाई यांनी बाजू मांडली. कुरेशी यांच्यावतीने अॅड. सत्यजित देसाई यांनी नोटीस स्वीकारली.