पतीनिधनानंतर दुसरा आधारही हरपला, १८ वर्षांच्या मुलाचा मृत्यू, खंबीर मातेचा आदर्श निर्णय

म.टा. विशेष प्रतिनिधी, नागपूर : पितृछत्र हरविल्यानंतर आईसह आयुष्य काढणाऱ्या बारावीतील विद्यार्थ्याच्या मृत्यूने कुटुंबावर दु:खाचा डोंगर कोसळला. मात्र असे असतानाही त्याच्या आईने मुलाच्या अवयवदानाचा निर्णय घेतला आणि पाच जणांना नवीन आयुष्य मिळाले. हेमाशीष उपाख्य आर्यन सुनील बनकर असे या विद्यार्थ्याचे नाव आहे. तो १८ वर्षांचा होता.

खारपखेड्यानजिक भानेगाव येथे राहणाऱ्या हेमाशिषने नुकतीच बारावीची परीक्षा उत्तीर्ण केली होती. त्यामुळे घरात आनंदाचे वातावरण असतानाच काळाने घाला घातला. हेमाशिषला पुढे एनडीएमध्ये जायचे होते; मात्र, १९ मे रोजी रात्री झालेल्या अपघाताने त्याच्या स्वप्नांचाही चुराडा झाला. आठ वर्षांपूर्वी त्याच्या वडिलांचे निधन झाले होते. त्यामुळे तो व आई रीता हेच एकमेकांचा आधार होते.

१९ तारखेला मोटरसायकलला अपघात होऊन त्याच्या डोक्याला गंभीर इजा झाली. त्याला उपचारासाठी लगेच ॲलेक्सिस रुग्णालयात दाखल करण्यात आले. तेथे त्याच्यावर शस्त्रक्रिया करण्यात आली. मात्र तीन दिवसांच्या उपचारांना प्रतिसाद मिळत नसल्याने डॉ. नीलेश अग्रवाल, डॉ. आदित्य अटल, डॉ. संजय कृपलानी, डॉ. अभिषेक बनकर यांनी त्याला मेंदुमृत घोषित केले.

सात जणांच्या कुटुंबाची कार पुराच्या पाण्यात अडकली, काही क्षणातच नको ते घडलं!
प्रीती जैन, डॉ. मृणाल खोडे यांनी त्याच्या आईला अयवदानाचे महत्त्व समजावून सांगितल्यावर फुफ्फुस, हृदय, यकृत, दोन्ही किडन्या व नेत्रदानाला त्यांनी संमती दिली. आपला मुलगा अतिशय मनमिळाऊ होता. यानिमित्ताने तो अन्य कुणाच्यातरी शरीरात जिवंत राहील, असे त्या मातेने सांगितले. झोनल ट्रान्सप्लांट को-ऑर्डिनेशन कमिटीने या अवयवदानाविषयी देशभर संदेश दिला.


त्यानुसार त्याचे हृदय चेन्नई येथे एका २६ वर्षीय तरुणीसाठी, तर दोन्ही फुफ्फुस चेन्नई येथेच एका ५९ वर्षांच्या महिलेसाठी पाठविण्यात आले. यकृताचे प्रत्यारोपण ॲलेक्सिसमध्ये २४ वर्षीय तरुणावर करण्यात आले. एक किडनी याच रुग्णालयात ५१ वर्षीय पुरुषाला देण्यात आली, तर दुसरी किडनी वोक्हार्टमधील ३२ वर्षीय रुग्णावर प्रत्यारोपित करण्यात आली. माधव नेत्रपेढीला नेत्रदान करण्यात आले.

सर्पदंशाने १३ वर्षांचा मुलगा गेला, पुत्रवियोगाचं दुःख सारलं, आई-वडिलांचा कौतुकास्पद निर्णय
फुफ्फुस व हृदय चेन्नईला पाठविण्यासाठी वाहतूक पोलिस उपायुक्त चेतना तिडके यांच्या मार्गदर्शनात ॲलेक्सिपासून विमानतळापर्यंत ग्रीन कॉरिडॉर तयार करण्यात आला व १२ मिनिटांत हे दोन्ही अवयव चार्टर विमानात पोहोचविण्यात आले.