रोजगारासाठी झेडपीचे प्रशिक्षण

म.टा. प्रतिनिधी, नागपूर

उच्चशिक्षण घेऊनही रोजगार मिळत नसल्याने अनेक तरुणांचा हिरमोड होतो. बेरोजगारीमुळे त्यांच्यात येणारे नैराश्य दूर करण्यासाठी त्यांना बारावीपासूनच रोजगार मिळाल्यास अनेकांचे जीवन उज्ज्वल होऊ शकते, या उद्देशाने जिल्हा परिषदेच्या जिल्हा ग्रामीण विकास यंत्रणेने (डीआरडीए) विद्यार्थ्यांसाठी प्रशिक्षण सुरू केले आहे.

यंदा २ हजार विद्यार्थ्यांना प्रशिक्षण दिले जाणार आहे. जिल्ह्यातील ग्रामीण भागातील आठवी ते बारावीपर्यंतच्या विद्यार्थ्यांना निवास, भोजन आणि रोजगार मिळवून देण्यासाठी ही यंत्रणा काम करणार आहे. दरवर्षी ‌जिल्हा ग्रामीण विकास यंत्रणेमार्फत बेरोजगारांसाठी प्रशिक्षण कार्यक्रम राबविण्यात येते. यंदा दोन हजार विद्यार्थ्यांना विविध कंपन्यांमध्ये रोजगार उपलब्‍ध करून देण्यात येईल. तीन महिन्यांचे प्रशिक्षण विद्यार्थ्यांना देण्यात येणार आहे. यासाठी रिटेल, मॅनेजमेंट, मार्केटिंग, बीपीओ आणि सोलर क्षेत्राशी निगडीत माहिती दिली जाणार आहे. या क्षेत्रात उत्तम करिअर करण्यासाठी ग्रामीण भागातील विद्यार्थ्यांसाठी ही सुवर्णसंधी आहे. प्रशिक्षण पूर्ण केल्यास विद्यार्थ्यांना दर महिन्याला जवळपास ७ हजार रुपये वेतन मिळेल. सध्या विद्यार्थ्यांना वर्धा मार्गावरील एका कॉलेजमध्ये म‌हिनाभराचे प्रशिक्षण देण्यात आले आहे. उर्वरित दोन महिने पुन्हा तज्‍ज्ञ मंडळीकडून विद्यार्थ्यांना मार्गदर्शन मिळेल. यासाठी जिल्हा परिषदेला काही कॉलेज आणि सामाजिक संस्‍था सहकार्य करीत आहेत. येथून विद्यार्थ्यांना नावाजलेल्या कंपन्यांतही काम करण्याची संधी मिळू शकते. ग्रामीण भागातील विद्यार्थ्यांकडे बरेचदा कागदपत्रे नसतात.

मात्र, अशा विद्यार्थ्यांनाही येथे संधी देऊन रोजगार देण्याचा प्रयत्न आहे, अशी माहिती विकास यंत्रणेच्या सहायक प्रकल्प संचालक भाग्यश्री भोयर यांनी दिली.