राष्ट्रवादी महिला आंदोलनाच्या तयारीत

म.टा. प्रतिनिधी, नागपूर

सरकारविरुद्ध हिवाळी अधिवेशनात पायी दिंडी काढून हल्ला बोल आंदोलन करणाऱ्या राष्ट्रवादी काँग्रेसने आता महिला आघाडीच्या माध्यमातून पावसाळी अधिवेशनात परत राज्यकर्त्यांना घेरण्याची तयारी केली आहे. महिला आघाडीने विविध सामाजिक प्रश्नांवर महिला संमेलन आयोजित करून आंदोलनाचा बिगुल फुंकला आहे.

पक्षाच्यावतीने 'संविधान बचाव' अभियानांतर्गत विविध कार्यक्रम आयोजित करण्यात येत आहे. या श्रुंखलेत येत्या १८ जुलै रोजी दुपारी २ वाजता देशपांडे सभागृहात महिला संमेलन होणार आहे. या माध्यमातून सरकारच्या धोरणाविरुद्ध आवाज बुलंद करण्यात येईल, असा इशारा राष्ट्रवादी महिलाच्या राष्ट्रीय अध्यक्ष फौजिया खान यांनी मंगळवारी एका पत्रकार परिषदेत दिला.

संमेलनाच्या तयारीसाठी पहिली बैठक नागपुरातच झाली. विदर्भाच्या सर्व जिल्ह्यात बैठका घेऊन अधिकाधिक महिलांचा सहभाग मिळवण्यासाठी प्रयत्न करण्यात येतील. आंदोलनादरम्यान ईव्हीएम आणि मनुस्मृतीची प्रतिकात्मक होळी करण्यात येईल, असेही त्यांनी सांगितले.

केंद्र व राज्यातील भाजप सरकारकडून राज्यघटनेचे वारंवार उल्लंघन करण्यात येत आहे. महिलांसमोर सुरक्षेचे आव्हान आहे. देशातील अत्याचाराच्या घटनेत भाजप नेते अडकले आहेत. भाजपच्या २२ आमदारांवर अत्याचाराचा प्रकरण सुरू आहे. मुस्लिम समाजातील महिलांना न्याय देण्याच्या मुद्यांवर त्यांची दिशाभूल करण्यात येत आहे. त्याविरोध मुस्लिम महिला देखील रस्त्यावर आल्या आहेत. कोरेगाव भीमा येथील घटनेतील दोषींना शिक्षा देण्याऐवजी सरकारकडूनच इतरांविरुद्ध अपप्रचार सुरू असल्याची टीका खान यांनी केली. विरोधी पक्षाला कमकुवत करण्याचे काम सरकारकडून सुरू आहे. आणीबाणीसाठी काँग्रेसने माफी मागितली होती. मात्र, सद्यस्थितीत देशात अघोषित आणीबाणी लादल्याचे दिसून येते. अभिव्यक्ती स्वातंत्र्यावर गदा आणली जात असल्याचा आरोपही फौजिया खान यांनी केला. पत्रकार परिषदेला माजी मंत्रीद्वय अनिल देशमुख व रमेश बंग, माजी नगरसेवक राजू नागुलवार आदी उपस्थित होते.