आठ दिवस झाले, झेडपीला सीईओ नाही; नागपुरात येण्यास अधिकारी अनुत्सुक

नागपूर : बुलडाणा जिल्हा परिषदेच्या मुख्य कार्यकारी अधिकारी (सीईओ) भाग्यश्री विसपुते यांची नागपूर जिल्हा परिषदेच्या सीईओपदी बदली करण्यात आली आहे. त्यांचा बदलीचा आदेश १७ नोव्हेंबर रोजी निघाला. मात्र, आठ दिवसांपेक्षा अधिक काळ होऊनही त्या रुजू झालेल्या नाहीत. त्या नागपुरात येण्यास अनुत्सुक असल्याची माहिती आहे.

यापूर्वीचे मुख्य कार्यकारी अधिकारी (सीईओ) योगेश कुंभेजकर यांची बढती भंडारा जिल्हाधिकारी म्हणून करण्यात आली. त्यांच्या जागी विसपुतेंची बदली झाली आहे. परंतु, केंद्र शासनाच्या एका कार्यशाळेला त्या दिल्लीला असल्याने पदभार दोन दिवसांनंतर स्वीकारण्यात येईल, अशी माहिती होती़ सोमवार, २१ नोव्हेंबर रोजी त्या पदभार घेतील, असेही सांगण्यात आले होते. मात्र, अद्यापही त्या रुजू न झाल्याने विविध चर्चांना वेग आला आहे. कुंभेजकरांनी आदेशांनुसार आपला पदभार विभागीय आयुक्तांच्या आदेशाने अतिरिक्त सीईओ डॉ. कमलकिशोर फुटाणे यांच्याकडे सोपवून भंडारा जिल्हाधिकारिपदाची सूत्रे स्वीकारली. मात्र, विसपुते अद्याप येथे रुजू झालेल्या नाहीत. त्या अनुत्सुक असल्याची तसेच भाजपच्या एका बड्या नेत्याचा त्यांना विरोध असल्याचीही चर्चा आहे.