म.टा. प्रतिनिधी, नागपूर
ब्रह्मोस या क्षेपणास्त्राची संवेदनशील माहिती लीक केल्याप्रकरणात अटकेतील ब्रह्मोस एअरोस्पेसचा सिस्टीम इंजिनीअर निशांत अगरवाल याच्यासह उत्तर प्रदेश एटीएसचे पथक बुधवारी दुपारी इंडिगोच्या विमानाने लखनौला रवाना झाले. तीन दिवसांचा ट्रान्झिट रिमांड घेतल्यानंतर एटीएसच्या पथकाने त्याला नागपुरातील अत्यंत सुरक्षित व गोपनीय ठिकाणी ठेवले होते. दोन दिवस येथे एटीएसच्या पथकाने त्याची कसून चौकशी केली. त्याला विमानाने लखनौला नेणार असल्याची माहिती फुटू नये, याची संपूर्ण काळजी एटीएसच्या पथकाने घेतली होती. दुपारी ३ वाजताच्या सुमारास स्थानिक एटीएसच्या अधिकाऱ्यांसह उत्तर प्रदेश एटीएसने निशांतला विमानतळावर नेले. दोन दिवसांत त्याच्याकडून ठोस माहिती काढण्यात एसटीएसला यश मिळाले नाही. लखनौ येथेही त्याची कसून चौकशी करण्यात येणार असून, तेथे त्याच्याकडून प्रकरणाशी संबंधित माहिती काढण्याचा प्रयत्न एटीएस करेल.
एटीएसच्या सूत्रांनी दिलेल्या माहितीनुसार, निशांत हा फेसबुकद्वारे २५पेक्षा अधिक तरुणींशी चॅटिंग करीत होता. त्यापैकी पाकिस्तानमधील 'आयपी अॅड्रेस' असलेल्या तरुणींच्या तो संपर्कात होता. पूजा व सेजल कपूर नावाच्या तरुणींनी 'हनी ट्रॅप'करून त्याच्याकडून ब्रह्मोसबाबतची गोपनीय माहिती मिळवल्याचा संशय एटीएसला आहे. या तरुणी प्रत्यक्षात आहेत की त्यांचा 'फेक आयडी' तयार करण्यात आला होता, याचाही तपास एटीएस करेल.
आयएसआयचा 'हनी ट्रॅप स्कॉड'
भारतातील वैज्ञानिकांकडून क्षेपणास्त्र व अन्य महत्त्वाची माहिती मिळविण्यासाठी पाकिस्तानची गुप्तचर यंत्रणा आयएसआयचा विशेष 'हनी ट्रॅप सोशल मीडिया स्कॉड' कार्यरत आहे. यातील बहुतांश आयडी हे पूजा, काजल व सेजल नावाने आहेत, अशी माहिती सूत्रांनी दिली.
निशांतच्या बँक खात्याचीही चौकशी
एसटीएसच्या पथकाने बुधवारी निशांतच्या नागपुरातील बँक खात्याचीही चौकशी केली. मात्र, या खात्यांमध्ये संशयास्पद व्यवहार झाल्याचे आढळून आलेले नाही. त्याची अन्य बँक खाती आहेत का, याच्यासह एटीएसचे पथक त्याच्या जवळच्या नातेवाइकांचीही बँक खाती तपासणार असल्याचे सूत्रांनी सांगितले.
वरिष्ठ वैज्ञानिक व निशांतचे सारखेच 'फ्रेण्ड'
कानपूरमधील एक महिला वरिष्ठ वैज्ञानिक (जी दर्जा) व निशांतचे बहुतेक फेसबुक फ्रेण्ड्स सारखेच आहेत, असे मिलिटरी इंटेलिएजन्सच्या पाहणीत आढळून आले. त्यामुळे गुप्तचर यंत्रणेने आधी महिला वैज्ञानिकाच्या फेसबुक चॅटिंगवर पाळत ठेवायला सुरुवात केली. महिलेपेक्षा निशांत हा पाकिस्तानचा आयपी अॅड्रेस असलेल्या फ्रेण्डसोबत तासंतास चॅटिंग करीत असल्याचे स्पष्ट होताच लखनौ येथील एटीएसने ४ ऑक्टोबरला निशांतविरुद्ध गुन्हा दाखल केला. त्यानंतर सोमवारी त्याला नागपुरात अटक केली.