‘त्या’ आवाजाने रेल्वेस्थानकावर खळबळ

नागपूर:

अचानक फटाका फुटल्यासारखा आवाज झाल्याने सोमवारी सायंकाळी क्षणभर रेल्वेस्थानकावर त्या ठिकाणी उपस्थित सारेच धास्तावले होते. मात्र, नंतर हा बसचा टायर फुटल्यामुळे झालेला आवाज असल्याचे लक्षात येताच सर्वांनी सुस्कारा सोडला.

रविवारीच श्रीलंकेत बॉम्बस्फोट होऊन शेकडो जीव गेले. सध्या जनमानसात या बॉम्बस्फोटांची चर्चा आहे. अशातच सोमवारी सायंकाळी एक मिनीबस प्रवाशांना घेऊन रेल्वेस्थानकवरील ड्रॉप अॅण्ड गो लेनमध्ये प्रवेश करीत असतानाच गाडीचा मागचा टायर फुटला आणि जोराचा आवाज झाला. या आवाजाने गाडीतील महिलाही किंचाळल्या. मात्र, नंतर त्यांना हा आपल्या गाडीच्या टायरचा आवाज असल्याचे लक्षात आले. अचानक बॉम्ब फुटल्यासारखा आवाज होताच आवाजाच्या दिशेने लोहमार्ग पोलिस आणि परिसरातील लोक धावले. काय झाले, म्हणून साऱ्यांच्या नजरा त्या वाहनाकडे लागल्या.

सायंकाच्या वेळी रेल्वेस्थानकावर प्रवाशांची वर्दळ असते. प्रवाशांना सोडायला येणाऱ्या दुचाकी आणि चारचाकी वाहनांच्या रांगा लागतात. दरम्यान सायंकाळी ५ ते ५.३० वाजताच्या सुमारास लोहमार्ग पोलिस ठाण्यासमोरच ड्राप अ‍ॅण्ड गोमधील दुसऱ्या लेनमधून ही मिनीबस जात ती. मिनी बसचा टायर दुभाजकाच्या लोखंडी पट्टीला घासल्याने अचानक टायर फुटला आणि मोठ्याने आवाज झाला. आवाज एवढा मोठा होता की, स्टेशन परिसरातील लोक धावले. अगदीच लोहमार्ग ठाण्यासमोरील हा प्रकार घडल्याने पोलिसांनीही घटनास्थळी धाव घेतली. पाहता पाहता बघ्यांची प्रचंड गर्दी झाली.

विशेष म्हणजे, याठिकाणी अशाप्रकारे चारचाकी वाहनांचा टायर नेहमीच फुटतो, अशी माहिती मिळाली. ड्रॉप अँड गो लेनमध्ये जेथून प्रवेश करतात त्याच ठिकाणी दुभाजकाची लोखंडी पट्टी बाहेर आली आहे. गाडी लेनमध्ये प्रवेश करताना ही पट्टी घुसून अनेक गाड्या पंक्चर झाल्या असल्याची माहिती स्टेशनवर मिळाली. हा दुभाजक दुरुस्त करावा, अशी मागणी आहे.