केंद्रीय मंत्री प्रल्हाद पटेलांची उपस्थिती
म.टा. प्रतिनिधी, नागपूर
आयुर्विमा क्षेत्रात काम करणाऱ्या नॅशनल ऑर्गनायझेशन ऑफ इन्शुरन्स वर्कर्स (एनओआयडब्ल्यू) संघटनेचा ५१वा वर्धापनदिन रविवार, ४ ऑगस्ट रोजी लक्ष्मीनगरातील हॉटेल अशोक येथे सायंकाळी ५.३९ वाजता आयोजित करण्यात आला आहे. या कार्यक्रमाला केंद्रीय सांस्कृतिक व पर्यटनमंत्री प्रल्हाद पटेल उपस्थित राहणार आहेत.
यासंदर्भात माहिती देताना नागपूर डिव्हिजन इन्शुरन्स वर्कर्स ऑर्गनायझेशन अर्थात 'एनडीआयडब्ल्यू'चे महामंत्री राकेश भूगांवकर यांनी सांगितले की, आयुर्विमा क्षेत्रात काम करणाऱ्या 'एनओआयडब्ल्यू'ची स्थापना ४ ऑगस्ट १९६९ रोजी करण्यात आली. संघटनेतर्फे २०१८-१९ हे वर्ष स्वर्णजयंती म्हणून साजरे करण्यात आले. या स्वर्णजयंती वर्षाचा येत्या ४ ऑगस्ट रोजी समारोप होणार आहे. याप्रसंगी विश्व मराठी परिषदेचे अध्यक्ष आणि इन्शुरन्स अकॅडमी पुण्याचे संचालक क्षितिज पाटुकले कार्यक्रमाच्या अध्यक्षस्थानी राहतील. आयुर्विमा महामंडळाच्या नागपूर विभागाचे वरिष्ठ मंडल प्रबंधक मुकेशचंद्र जोशी, 'एनओआयडब्ल्यू'चे राष्ट्रीय अध्यक्ष अतुल देशपांडे, राष्ट्रीय महामंत्री महादेव बापट प्रामुख्याने उपस्थित राहणार आहेत.
'एनओआयडब्ल्यू'च्या सुवर्ण वर्ष समारोप समारंभाला देशभरातील 'एनओआयडब्ल्यू'चे सर्व पदाधिकारी, प्रतिनिधी प्रामुख्याने हजेरी लावणार आहेत. यावेळी विमा कर्मचारी, स्थानिक पदाधिकारी व नागरिकांनी उपस्थित राहावे, असे आवाहन करण्यात आले आहे.