म.टा. प्रतिनिधी, नागपूर
'बँकेत प्रत्यक्ष हजर राहुन यादीतील आपले नाव पहावे तसेच स्वाक्षरीच्या रकान्यात शाखा व्यवस्थापकासमक्ष स्वाक्षरी करावी', असे आवाहन प्रशासनाकडून निवृत्तीवेतनधारकांना करण्यात आले आहे. मात्र काही बँका निवृत्तीवेतनधारकांना हयातीचा दाखला देण्याची सेवा पुरविण्यासाठी हात वर करत असल्याची तक्रार निवृत्तीवेतन धारकांनी केली.
निवृत्तीवेतनधारकांची आद्याक्षरनिहाय अद्ययावत यादी निवृत्तीवेतनधारकांच्या संबंधित बँक शाखांकडे पाठविण्यात आली आहे. निवृत्ती तसेच कुटुंब निवृत्तीवेतनधारक ज्या बँकेतून निवृत्तीवेतन घेत असतील त्यांनी १ नोव्हेंबर ते ३० नोव्हेंबर २०१९ या कालावधीत बँकेत प्रत्यक्ष हजर राहुन यादीतील त्यांचे नाव पहावे. त्यानंतर स्वाक्षरीच्या रकान्यात शाखा व्यवस्थाकासमक्ष स्वाक्षरी करावी किंवा अंगठ्याचा ठसा उमटवावा. हे करताना त्यांनी अचूक पॅन क्रमांक नमूद करावा अशा सूचना त्यांना देण्यात आल्या आहेत. पुनर्विवाह तसेच पुनर्नियुक्तीबाबत माहिती लागू असल्यास ती नोंदवणेही अनिवार्य आहे, अशा सूचना लेखा विभागाकडून निवृत्तीवेतनधारकांना देण्यात आल्या आहेत. या सूचनेनुसार ज्येष्ठ नागरिक बँकांमध्ये पोहोचत असताना त्यांना बँकेच्या अधिकारी परत पाठवित आहे. आमच्याकडे आता हे काम होत नाही, तुम्ही पीएफ कार्यालयात जा, तिथे जीवनप्रमाणपत्र देण्याची सुविधा उपलब्ध आहे, असे उत्तर अधिकाऱ्यांकडून दिले जात असल्याचे आर्य वैश्य ज्येष्ठ नागरिक मंडळाचे अध्यक्ष सुरेश तन्नीरवार यांनी सांगितले.
नोव्हेंबर अखेरपर्यंतची मुदत
आखिल भारतीय सेवेतून सेवानिवृत्त झालेले अधिकारी व महाराष्ट्र राज्य शासकीय निवृत्तीवेतनधारक, कुटुंब निवृत्तीवेतनधारकांनी १ नोव्हेंबर ते ३० नोव्हेंबर या कालावधीत हयातीचा दाखला द्यावा असे आवाहन लेखा कार्यालयाकडून करण्यात आले आहे. http://jeevanpramaan.gov.in या केंद्र शासनाच्या संकेतस्थळावरून जीवन प्रमाण दाखला (डिजिटल लाइफ सर्टिफिकेट) सादर करण्याची सुविधा उपलब्ध आहे. अधिदान व लेखा कार्यालयातून निवृत्तीवेतन घेणाऱ्या सर्व निवृत्तीवेतनधारकांसाठी चालू वर्षी १ नोव्हेंबरनंतर दाखल करावयाचे हयातीचे दाखले या संकेतस्थळावरून नोंदणी करून सादर करण्याची सुविधा उपलब्ध करून देण्यात आली आहे. जीवनप्रमाण पोर्टलवर नोंदणी करताना निवृत्तीवेतनधारकांनी ते ज्या कोषागारामधून निवृत्तीवेतन घेत आहेत त्या कोषागाराची निवड करावी. स्वत:चे संपूर्ण नाव, भ्रमणदूरध्वनी क्रमांक, आधार क्रमांक, बँक खाते क्रमांक व निवृत्तीवेतन प्रदान आदेश क्रमांक (पीपीओ नंबर) अचूक नोंदवावा लागणार आहे.
-तर डिसेंबरची 'पेन्शन' नाही
नियमित निवृत्तीवेतनासाठी जे निवृत्तीवेतनधारक जळच्या आधार केंद्रावर अथवा खासगी संगणकीकृत जीवनप्रमाण सुविधा केंद्राद्वारे हयातीचे दाखले सादर करून इच्छितात त्यांनी प्रथम त्यांचा पीपीओ नंबर अचूक असल्याची खात्री करून घ्यावी. जे निवृत्तीवेतनधारक अधिदान व लेखा कार्यालयात समक्ष उपस्थित राहुन जीवनप्रमाण पोर्टलद्वारे जीवनप्रमाण संगणीकृत हयातीचा दाखला (डिजिटल सर्टिफिकेट) सादर करू इच्छितात त्यांच्यासाठी अधिदान व लेखा कार्यालयात निवृत्तीवेतन शाखेत सुविधा उपलब्ध करून देण्यात आली आहे. ज्या निवृत्तीवेतनधारकांनी यादीतील त्यांच्या नावासमोर स्वाक्षरी किंवा अंगठ्याचा ठसा केला नसेल किंवा संगणकीकृत जीवनप्रमाण दाखल (डिजिटल लाइफ सर्टिफिकेट) सादर केला नसेल त्यांचे निवृत्तीवेतन डिसेंबर २०१९ पासून स्थगित करण्यात येईल, असे लेखा कार्यालयाने कळविले आहे.