म.टा. प्रतिनिधी, नागपूर
मानकापूर भागात राहणाऱ्या १६ वर्षीय मुलीचे अपहरण करुन तिच्यावर अत्याचार करणाऱ्या कुख्यात गुन्हेगाराला मानकापूर पोलिसांनी सिनेस्टाइल अटक केली. गुरुदयाल खतरिया (वय २२, रा. झिंगाबाई टाकळी) हे अटकेतील गुन्हेगाराचे नाव आहे. गुरुदयाल हा कुख्यात घरफोड्या आहे. त्याच्याविरुद्ध ११ गुन्हे दाखल आहेत.
गुरुदयालाने मानकापूर भागात राहणाऱ्या १६ वर्षीय मुलीला प्रेमाच्या जाळ्यात अडकविले. तिला लग्नाचे आमिष दाखविले. १२ एप्रिलला दुपारी त्याने मुलीचे अपहरण केले. मुलगी बेपत्ता झाल्याने तिच्या नातेवाईकांनी मानकापूर पोलिसांत तक्रार केली. पोलिसांनी अपहरणाचा गुन्हा दाखल करुन मुलीचा शोध सुरू केला. गुरुदयाल हा पिटेसूर भागातील जंगलात एका मुलीसोबत असल्याची माहिती पोलिसांना तपासादरम्यान मिळाली. पोलिस उपायुक्त विनिता साहू यांच्या मार्गदर्शनाखाली मानकापूर पोलिस स्टेशनचे वरिष्ठ पोलिस निरीक्षक गणेश ठाकरे यांच्या नेतृत्वात उपनिरीक्षक अमित मिश्रा, शिपाई प्रमोद दिघोरे, इस्माइल नौरंगाबादे, सुनील विश्वकर्मा व महिला पोलिस शिपाई मिना मस्के यांनी सापळा रचला. पोलिसांना बघताच गुरुदयाल जंगलात पळायला लागला. पोलिसांनी त्याचा बऱ्याच अंतरापर्यंत पाठलाग करुन अटक केली. त्यानंतर मुलीची सुटका केली. त्याने मुलीवर अत्याचार केल्याचे स्पष्ट झाल्याने पोलिसांनी अत्याचाराचाही गुन्हा दाखल केला.
फेसबुक पोस्टमुळे अडकला
गुरुदयालने फेसबुकवर एक संदेश पोस्ट केला होता. हा संदेश त्याच्या मित्राने बघितला. या फेसबुकपोस्टच्या आधारे पोलिसांनी त्याचे 'लोकेशन' शोधले. त्याआधारे पोलिसांनी गुरुदयालला अटक केली.