म.टा. प्रतिनिधी, नागपूर
मेक इन इंडिया, मेक इन महाराष्ट्र सोबतच आता 'मेक इन नागपूर' ची नवी संकल्पना राबविली जात आहे. मेट्रोमुळे नागरिकांच्या जीवनात सकारात्मक परिवर्तन होणार असून भविष्यात विकासाचे नवे पर्याय उपलब्ध होणार असल्याचे महामेट्रोचे व्यवस्थापकीय संचालक ब्रिजेश दीक्षित यांनी सांगितले.
रोटरी क्लबच्यावतीने रविवार १७ जून २०१८ रोजी हॉटेल सेंटर पॉइंट येथे सन्मान सोहळ्याचे आयोजन करण्यात आले होते. या सोहळ्यात महा मेट्रोचे व्यवस्थापकीय संचालक डॉ. ब्रिजेश दीक्षित यांना रोटरी क्लबचे डिस्ट्रीक्ट गवर्नर डॉ. के. एस.राजन यांच्या हस्ते 'रोटरी व्होकेशनल एक्सीलेंस अवार्ड'ने सन्मानीत करण्यात आले. यावेळी मंगेश जोशी, राजेंद्र सिंह खुराना, डॉ. विनय तुले, शशांक विश्वरूपे, शब्बीर शाकीर, माधवेद्र जैन, रघुवीर सिंह, महा मेट्रोचे महाव्यवस्थापक (प्रशासन) अनिल कोकाटे आदी उपस्थित होते.
महामेट्रोच्या माध्यमातून शहराची वाटचाल आधुनिक विकासाकडे होत आहे. नागपूर शहर स्मार्ट सिटीकडे अग्रेसर आहे. प्रदूषणावर मात करून पर्यावरणाचे संतुलन राखण्याचे सर्व प्रयत्न महामेट्रो करत आहे. येत्या काळात नागरिकांनी ज्यास्तीत ज्यास्त संख्येने मेट्रोचा उपयोग करावा असे, आवाहन दीक्षित यांनी केले. दोन्ही टप्प्यातले कार्य पूर्ण झाल्यानंतर तब्बल ५ लाख नागरिक दररोज मेट्रोने प्रवास करणार असल्याचा विश्वास डॉ. बृजेश दीक्षित यांनी व्यक्त केला.
मेट्रोचे नफ्याचे गणित
देशात निर्माणाधीन असलेल्या इतर मेट्रो प्रकल्पाच्या तुलनेत नागपूर मेट्रो प्रकल्पात दिव्यांग, नेत्रहीन, जेष्ठ अश्या प्रत्येक व्यक्तीचा विचार करून सुविधायुक्त मेट्रो स्थानके आणि मेट्रो कोचेसचे निर्माण केल्या जात आहे. महा मेट्रो केवळ व्यावसायिक उद्देशातूनच नाही तर विकासाच्या दिशेने देखील कार्य करीत आहे. नागरिकांच्या सर्वागीण विकासात मेट्रो फायदेशीर ठरणार असल्याचा विश्वास दीक्षित यांनी व्यक्त केला.
नागपूर मेट्रोची वैशिष्ट्ये
- मेट्रो सुरू होण्यापूर्वीच १०० कोटीचे उत्पन्न प्राप्त झाले आहे.
- फाइव्ह-डी बीम प्रणालीच्या माध्यमातून निर्धारित वेळेत कार्य पूर्ण करून महा मेट्रोने ८०० कोटीची बचत करून १०० कोटींचे उत्पन्नही मिळविले आहे.
- सोलर एनर्जीचा अधिकाअधिक वापर करून विजेच्या रकमेत ही मोठी बचत होणार.
- सुमारे १० लाख चौरस फूट परिसरात सोलर पॅनेल बसविण्यात येणार आहे. यामुळे भविष्यात ९.५० रुपये प्रती युनिट दराने मिळणारी वीज केवळ ३.५० रुपये प्रति युनीट या नाममात्र दरात उपलब्ध होणार आहे.