म. टा. वृत्तसेवा, गोंदिया
जगभरात करोनाच्या विषाणूची धास्ती परसली आहे. स्वच्छता हा रामबाण उपाय असल्याचे प्रशासन ठासून सांगू लागले आहे. याच व्यवस्थेतील एक भाग असलेल्या गोंदिया नगर परिषेदला स्वच्छतेचा विसर पडला आहे. रेल्वेस्थानकाजवळील वर्दळीच्या प्रभू रोडवर दारूच्या बाटल्या, पाण्याच्या पाऊच पडले आहेत. सारा परिसर दुर्गंधीने व्यापल्याने या रस्त्यावरून जाणाऱ्यांना हे 'प्रभू' म्हणण्याची वेळ आली आहे.
व्यापारीनगरी म्हणून गोंदिया शहराची ओळख आहे. या शहरात जिल्हाधिकारी कार्यालयासह अन्य शासकीय, निमशासकीय, खासगी कार्यालयांचा डेरा आहे. मोठमोठे व्यापारी प्रतिष्ठाने आहेत. शिवाय दक्षिण-पूर्व-मध्य रेल्वेला सर्वाधिक उत्पन्न देणारे रेल्वेस्थानकदेखील आहे. रेल्वेची सुविधा असल्याने नागपूर आणि रायपूर या दोन्ही बाजूने आवागमन करणाèऱ्या प्रवाशांची संख्या हजारोंच्या घरात आहे. कुणी कामानिमित्त तर कुणी नोकरीनिमित्त शहरात पाय ठेवतो. त्यामुळेच की काय, रेल्वेस्थानकाजवळच्या प्रभूरोडवर मोठी व्यापारी प्रतिष्ठाने, खानावळ, महिला अर्बन बँकेसह अन्य कार्यालये वसली. रेल्वेने प्रवास करणारे प्रवासी 'शॉर्टकट' म्हणून प्रभू रोडने अधिक आवागमन करतात. सद्यःस्थितीत या मार्गावरील नागरिकांची ये-जा वाढली आहे. परंतु, या वर्दळीच्या ठिकाणाकडे स्वच्छतेच्या बाबतीत नगरपालिकेचे लक्ष गेले नाही.
गेल्या कित्येक दिवसांपासून या रस्त्यावर घाणीचे साम्राज्य पसरले आहे. दारूच्या बाटल्या, पाण्याच्या पाऊचचा सडा पडलेला आहे. कित्येक दिवस हा कचरा उचलला जात नसल्याने परिसरात दुर्गंधीने कळस गाठला आहे. नाकावर रुमाल मांडूनच प्रवाशांसह अन्य सामान्य नागरिक व व्यापाèऱ्यांना आवागमन करावे लागते. उल्लेखनीय म्हणजे, या परिसरात आजबाजूला मुतारीची कोणतीही सोय नाही. त्यामुळे ऐन रस्त्यावर उघड्यावर लघुशंका करण्याचे प्रमाणही वाढले आहे. डुकरांचा हैदोस हा नेहमीचाच झाला आहे. स्वच्छतेचा दावा करणाऱ्या नगरपालिकेने करोनाने गोंदिया शहरात पाय रोवूच नये, म्हणून या परिसरात ताबडतोब स्वच्छता मोहीम राबवावी, अशी मागणी नागरिकांनी केली आहे.
आवार भिंतीआड रंगतात दारूड्यांच्या पार्ट्या
रेल्वेस्थानक परिसरात म्हणजेच, या रस्त्यावर देशी, विदेशी दारूचे दुकान आहे. त्यामुळे दिवसाढवळ्या नशेत तर्रर्र राहणाèऱ्यांची संख्याही कमी नाही. रात्रीला मात्र दारूड्यांचा घोळका या रस्त्याशेजारी हमखास पाहायला मिळतो. आवार भिंतीआड दारूड्यांच्या पार्ट्या रंगताना दिसतात. नशेत असताना त्यांच्यातील अश्लिल हावभाव आवागमन करणाèऱ्या महिला, मुलींना त्रासदायक ठरतात.