म.टा. प्रतिनिधी, नागपूर
महापालिकेच्या शाळांमध्ये शिकणाऱ्या विद्यार्थ्यांची संख्या सतत कमीच होत आहे. २०१९-२० या शैक्षणिक सत्रात या शाळांत फक्त १५ हजार विद्यार्थी शिकत आहेत. २००५-०६ मध्ये संख्या ४२,३८३ होती.
'सरकारी शाळा वाचवा अभियान'च्या वतीने सादर करण्यात आलेल्या अहवालातून ही माहिती पुढे आली आहे. महापालिकेच्या बुडत्या शाळांना प्रशासनाचा आधार मिळावा, त्यातून विद्यार्थ्यांना दर्जेदार शिक्षण मिळावे यासाठी हा अहवाल मनपा आयुक्त तुकाराम मुंढे यांना सादर करण्यात आला. अहवालात शाळांची स्थिती, विश्लेषण, चिपको आंदोलन, मोहल्ला सभा, सरकारी शाळा वाचवा परिषद, तथ्यशोधन समितीचा अहवाल, शिक्षणतज्ज्ञ व प्रयोगशील शिक्षकांशी संवाद, उच्च न्यायालयात जनहित याचिका आणि कार्यकर्त्यांचे बेमुदत उपोषण आदींचा समावेश आहे.
सुधारणेसाठी ३९ शिफारशी
मनपा शाळांची परिस्थिती सुधारण्यासाठी अहवालात ३९ शिफारशी करण्यात आल्या आहेत. त्यात रंगरंगोटी, बांधकाम, स्वच्छता, पिण्याचे पाणी, नवे फर्निचर, स्मार्ट गणवेश, बूट, दप्तर, माध्यान्ह भोजन, आरोग्य तपासणी, संगणक प्रशिक्षण, इ-लर्निंग, खेळाचे साहित्य आदींचा समावेश आहे. इंग्रजीचे बंधन न घालता हा विषय ऐच्छिक करण्यात यावा, असेही सुचविण्यात आले आहे.
नागपूर शहरातील शाळांची पटसंख्या (२०१८-१९)
शाळा : एकूण विद्यार्थी : टक्केवारी
नागपूर महापालिका : १७,०२९ : ५.४८
खासगी शाळा : १,७६,२५६ : ५६.४६
स्वयंसहायित शाळा : ९८,६९१ : ३१.७८
इतर शाळा : १८,५३७ : ५.९६
एकूण : ३,१०,५१३