भाजप-शिवसेनाही त्यातलेच निघाले: राज ठाकरे

म. टा. वृत्तसेवा, यवतमाळ

पूर्वी आम्ही काँग्रेसला शिव्या देत होतो. भाजप, शिवसेनाही त्यातलेच निघाले. त्यांची भूमिका नेहमी नाटकी राहिली आहे. सतत राजीनामा देण्याची धमकी दिली जाते. पण, पैशांची कामे पूर्ण होताच राजीनामे खिशात ठेवले जातात, अशी टीका मनसेचे अध्यक्ष राज ठाकरे यांनी केली.

वणी येथील वसंत जिनिंगमध्ये सोमवारी मनसे कार्यकर्ता मेळावा आयोजित करण्यात आला होता. यावेळी ते बोलत होते. राज म्हणाले, राज्यात सर्वत्र दुष्काळी परिस्थिती असताना दसरा मेळाव्यात दुष्काळ बाजूला ठेऊन राम मंदिराच्या मुद्दा पुढे करण्यात आला. ऑक्टोबरमध्येच जमीन भेगाळली आहे. शेतात पीक होण्याची आशा मावळल्याने शेतमजुरांचे स्थलांतर सुरू झाले आहे. यवतमाळ जिल्ह्यात येत असताना भीषण परिस्थितीची जाणीव झाली. या प्रश्नाकडे लक्ष देण्यापेक्षा राम मंदिराला प्राधान्य देण्यात आले. शेतकरी आणि बेरोजगारांच्या प्रश्नांवर सरकार गंभीर नसल्याचा आरोपही त्यांनी केला. डिसेंबर महिन्यात पुन्हा यवतमाळ जिल्ह्यात येणार असल्याची ग्वाहीही त्यांनी दिली.

मेळाव्यादरम्यान माजी आमदार बाळा नांदगावकर, मनसेचे राज्य उपाध्यक्ष राजू उंबरकर यांनीही विचार मांडले. गेल्या विधानसभा निवडणुकीच्या वेळी मनसेचे उमदेवार राजू उंबरकर यांच्या प्रचारसभेसाठी राज ठाकरे आले होते. त्यानंतर राज सोमवारी वणी शहरात आल्याने शिवाजी चौकात त्यांच्या स्वागतासाठी कार्यकर्त्यांनी गर्दी केली होती. वणीला येण्यापूर्वी नेर येथे राज यांचे स्वागत झाले. आगामी लोकसभा आणि विधानसभा निवडणुकीच्या पार्श्वभूमीवर हा त्यांचा दौरा होता.