नऊपैकी एकच डॉक्टर कार्यरत

खेमेंद्र कटरे, गोंदिया

देवरी ग्रामीण रुग्णालयासाठी वैद्यकीय अधिकाऱ्यांची नऊ पदे मंजूर करण्यात आली आहेत. त्यापैकी केवळ पाच पदे भरण्यात आली. पण, दोन वैद्यकीय अधिकारी उच्च शिक्षणासाठी तर दोघे प्रतिनियुक्तीवर पाठविण्यात आले आहेत. केवळ एका वैद्यकीय अधिकाऱ्याच्या भरवशावर सर्व रुग्णालयाचा कारभार सांभाळला जात आहे. त्यामुळे आदिवासींच्या आरोग्याचा प्रश्न बिकट झाला आहे.

राष्ट्रीय महामार्ग क्रमांक सहावर देवरीचे ग्रामीण रुग्णालय आहे. गावातच ट्रामा सेंटरची सोय आहे. त्यांच्या सोबतीला देवरी व चिचगड येथील रुग्णालये आहेत. यात दररोज १५०-२०० बाह्य रुग्णांची तपासणी व औषधोपचार होतो. या रुग्णालयातील आंतर रुग्ण विभाग हा नेहमीच हाउसफुल्ल असतो. राष्ट्रीय महामार्गावरील रुग्णालय असल्याचे येथे अपघातातील जखमीसुद्धा औषधोपचारासाठी आणले जातात. याशिवाय देवरीपासून साकोली व आमगाव वगळता शवविच्छेदनाचे कार्य एकट्या देवरी येथे उपलब्ध आहे. शिवाय फौजदारी प्रकरणातील रुग्णांचा भार व तालुक्यातील इतर प्राथमिक आरोग्य केंद्रांतील शस्त्रक्रियेची जबाबदारी याच रुग्णालयाच्या वैद्यकीय अधिकाऱ्यांना पार पाडावी लागते. त्यामुळे मंजूर नऊ अधिकारी असणे आवश्यक आहे. त्यापैकी पाचच पदे भरली गेलेली आहेत. त्यातही दोन वैद्यकीय अधिकारी हे उच्च शिक्षणासाठी तर उर्वरित दोन वैद्यकीय अधिकारी हे प्रतिनियुक्तीवर पाठविण्यात आले आहेत. दोन दिवसांपूर्वीच डॉ. भोंगाडे यांना चिचगड येथे पाठविण्यात आले. चिचगडचे डॉ. खरोले हे रजेवर गेले असून त्यांच्या परत रुजू होण्यावर शंका व्यक्त होत आहे. दुसरे वैद्यकीय अधिकारी डॉ. गुल्हाणे यांना नवेगाव येथील रुग्णालयाचा प्रभार सोपविण्यात आला आहे. त्यामुळे डॉ. दीपक धुमनखेडे हे एकमेव वैद्यकीय अधिकारी सेवेत असल्याने आदिवासींच्या आरोग्याचा प्रश्न निर्माण झाला आहे.

उपजिल्हा रुग्णालयाचा दर्जा असलेल्या तिरोडा येथील रुग्णालयापेक्षा देवरी रुग्णालयावर कामाचा ताण अधिक आहे. याशिवाय हा तालुका जंगलव्याप्त असल्याने व इतर भागातून स्थलांतरित रुग्णांचा ओढा अधिक असल्याने आरोग्यसेवेवर नेहमीच ताण असतो. याशिवाय आंतररुग्ण विभाग, शवविच्छेदन, शस्त्रक्रिया एकट्या वैद्यकीय अधिकाऱ्यावर अवलंबून असल्याने अडचणीत भर पडली आहे.

सालेकसा, आमगावातही अडचण

देवरीसह सालेकसा व आमगाव येथील रुग्णालयात वैद्यकीय अधिकाऱ्यांची वानवा आहे. यावर तातडीने उपाय योजण्याची गरज व्यक्त होत आहे. आर्जव, विनंत्याही केल्या जात आहेत. पण, कुणीही दखल घेत नसल्याने संताप वाढू लागला आहे.