म.टा. प्रतिनिधी, नागपूर
शिवसेनेचे युवा नेते आदित्य ठाकरे यांच्या पाठोपाठ माजी उपमुख्यमंत्री अजित पवार यांचा मुलगा पार्थ पवार यांनी गुरुवारी विधानभवनाला भेट दिली. यावेळी पार्थ यांनी विधिमंडळाचे कामकाज न्याहाळाले. एकीकडे पार्थ यांच्या हजेरीने राष्ट्रवादीच्या आमदारांचे चेहरे खुलले असतानाचा दुसरीकडे पार्थ राष्ट्रवादीचा भविष्यातील सारथी राहणार नाही ना, या चर्चेलादेखील उधाण आले.
विधिमंडळाचे कामकाज जाणून घेण्यासाठी प्रस्थापित राजकारण्यांची दुसरी पिढी उत्सुक असल्याचे दिसून येत आहे. नागपुरात सुरू असलेल्या पावसाळी अधिवेशनाला एकापाठोपाठ नेत्यांची मुलं हजेरी लावत आहेत. गुरुवारी शिवसेना पक्षप्रमुख उद्धव ठाकरे यांचे सुपुत्र आदित्य ठाकरे यांनी विधानभवनाला भेट दिली. दोन्ही सभागृहांचे कामकाज जाणून घेत आमदारांशी संवाददेखील साधला. यानंतर दुसऱ्याच दिवशी अजित पवार यांचे पुत्र पार्थ पवार यांनी विधानभवनात हजेरी लावली. काही जवळच्या आमदारांशी अनौपचारिक गप्पा मारल्या. आदित्य ठाकरे हे अधिवेशन असताना मुंबईत हजेरी लावतात. यावेळी त्यांनी नागपूरमध्येही उपस्थिती लावली. त्यानंतर आज पार्थ पवारदेखील कामकाज पाहण्यासाठी नागपूरला आले. पार्थ यांच्या विधानभवनातील प्रवेशाने विविध चर्चांना पेव फुटले. यामध्ये पवारांची तिसरी पिढी राजकारणात येण्याची आशा व्यक्त करण्यात येत आहे. यापूर्वी एका मुलाखतीत बोलताना अजित पवार यांनी त्यांची दोन्ही मुले राजकारणात येणार नसल्याचे सांगितले होते. मात्र, गेल्या काही वर्षांमध्ये राजकारण्यांची दुसरी पिढी पुढे येऊ लागली आहे. विशेषत: आदित्य ठाकरे सक्षमपणे युवासेनेचे नेतृत्व करीत आहेत. राज ठाकरे यांचा मुलगा अमित देखील हळूहळू राजकारणाकडे वळतोय. या पार्श्वभूमिवर अजित पवारांचा मुलगा राजकारणात आल्यास आश्चर्य वाटायला नको, असेदेखील काही जाणकारांचे म्हणणे आहे.