म. टा. विशेष प्रतिनिधी, नागपूर
पितृपक्ष पंधरवडा सुरू असल्याने भाजपची पहिली यादी या आठवड्याच्या अखेरीस येण्याचा अंदाज व्यक्त करण्यात येत आहे. त्यांच्या यादीनंतरच यादी जाहीर करण्याचा विचार काँग्रेसमध्ये सुरू असल्याचे समजते.
पुढच्या आठवड्यात ४ ऑक्टोबर रोजी नामांकनाचा अखेरचा दिवस आहे. त्यासाठी अद्याप वेळ असल्याने आताच नावे जाहीर करून बंडखोरांना वेळ मिळू नये, यासाठी 'हाडपकाचा' आधार घेतला जात आहे. या आधारेच काही पक्षांच्या मोजक्या उमेदवारांची घोषणा वगळता पक्षांचे पत्ते रविवारनंतर उघडले जातील. हमखास उमेदवारी मिळण्याची खात्री असणाऱ्या निष्ठावंतांचा अपवाद सोडून सर्वच पक्षाचे कुंपणावरील इच्छुक संशयाच्या घेऱ्यात आहेत. उमेदवारी नाकारल्यास बंडखोरी करतात का व कोणत्या पक्षाचा झेंडा हातात घेतात, याचाही अंदाज घेण्यात येत आहे.
बहुजन समाज पक्ष व वंचित आघाडीकडून विविध पक्षांच्या असंतुष्टांवर डोळा आहे. वंचितने मंगळवारी २२ उमेदवारांची घोषणा केली. बसपचे काही उमेदवार निश्चित झाल्याची चर्चा आहे. तथापि, २८८ जागांसाठी उमेदवार हवे असल्याने भाजप, काँग्रेसचे उमेदवार निश्चित झाल्यास त्याचा फायदा या पक्षांना मिळेल. महायुती आणि महाआघाडी झाल्यास विदर्भात शिवसेना व राष्ट्रवादीला कमी जागा मिळतील. त्यामुळे या दोन्ही पक्षातील इच्छुकांना कसे आकर्षित करायचे, याचाही विचार इतर पक्षांमध्ये सुरू असल्याची चर्चा आहे.
भाजप-शिवसेनेची युतीबाबत चर्चा सुरू आहे. जागा वाटपाचा तिढा अद्याप सुटलेला नाही. कशी स्थिती उद्भवते, यावरून उभय पक्षाचे इच्छुक सज्ज झाले आहेत. मात्र, ऐनवेळी युती होऊन जागा गेल्यास पुढे काय, असाही प्रश्न इच्छुकांसमोर आहे. अशा स्थितीत तयारी कशी करायची, याचाही विचार करण्यात येत आहे. आमची तयारी पूर्ण आहे. पक्षाच्या आदेशानुसार आम्ही काम करू, असे शिवसेनेच्या एका नेत्याने सांगितले. सद्यस्थितीत उमेदवारीसाठी सर्वाधिक डिमांड भाजपमध्ये आहे. पक्षाने केलेल्या सर्व्हेनुसार यादीदेखील तयार असल्याची चर्चा आहे. मात्र, अद्याप नेत्यांच्या बैठका झालेल्या नाहीत. तसेच, आधी युतीचा निर्णय होणे आवश्यक आहे. त्यावर सर्व निर्भर असून रविवारपर्यंत उमेदवारांचे सर्व चित्र स्पष्ट होईल, असे एका नेत्याने सांगितले.
काँग्रेस आणि राष्ट्रवादी काँग्रेसच्या जागांचाही घोळ कायम आहे. अर्थात नागपूर-विदर्भातील निवडक जागाच राष्ट्रवादीकडे असल्याने इतर जागांवर काँग्रेस इच्छुकांची तयारी झाली. आघाडीकडून शनिवारनंतरच चित्र स्पष्ट होण्याचे संकेत मिळाले असल्याचे काँग्रेसच्या नेत्याने सांगितले. नागपूरसह विदर्भात जागा वाढतील, असा विश्वास राष्ट्रवादीच्या नेत्यांनी व्यक्त केला.
......