हल्ल्याच्या निषेधार्थ संघटनेचा निर्णय
म. टा. प्रतिनिधी, नागपूर
टेलिफोन एक्स्चेंज चौकातील जय दुर्गा ऑटोमोबाइल्स या पेट्रोलपंपावर काही समाजकंटकांनी हल्ला केला. त्यानिषेधार्थ विदर्भ पेट्रोलियम डीलर्स असोसिएशनने आज, गुरुवारी दुपारी १२ ते ४ वाजतादरम्यान पेट्रोल पंप बंद ठेवण्याचा निर्णय घेतला आहे, अशी माहिती संघटनेचे अध्यक्ष अमित गुप्ता यांनी दिली.
जय दुर्गा ऑटोमोबाइल्स या पेट्रोल पंपावर २९ जानेवारी रोजी सकाळी ९ वाजतादरम्यान सहा जणांनी हल्ला चढविला. हल्लेखोर दोन दुचाकीवर आले होते. त्यामध्ये चार मुले आणि दोन मुली होत्या. पेट्रोल भरल्यानंतर पंप कर्मचाऱ्याने पैसे मागितले. त्यावर हल्लेखोरांनी धारदार शस्त्राने पंप कर्मचाऱ्यावर हल्ला केला. यामध्ये कर्मचारी जखमी झाला. इतर कर्मचाऱ्यांनी मिळून एकाजणाला पकडले आणि पोलिसांच्या स्वाधीन केले. अचानकपणे घडलेल्या या प्रकारामुळे पेट्रोल पंपमालक आणि कर्मचाऱ्यांमध्ये दहशतीचे वातावरण पसरले आहे. पंपवरील सीसीटीव्हीमध्ये हल्लेखोरांचे चेहरे स्पष्ट दिसून येत आहेत. याबाबत अधिक सांगताना अमित गुप्ता म्हणाले, 'मागील काही महिन्यांपासून पेट्रोलपंपवर कर्मचाऱ्यांशी वादविवाद करणे, शिवीगाळ, मारहाण असे प्रकार वाढले आहेत. या प्रकारच्या घटना सातत्याने घडत आहेत. त्याचा दुष्परिणाम पंपमालक आणि कर्मचाऱ्यांच्या मानसिक आरोग्यावर सुद्धा होत आहे. घडलेल्या घटनेबाबत लवकरात लवकर योग्य कारवाई करण्यात यावी, अशी मागणी करणारे निवेदन पोलिस आयुक्त डॉ. भूषणकुमार उपाध्याय यांना दिले आहे.'
ग्राहकांना आवाहन
पेट्रोलपंपावरील हल्ल्याचा निषेध म्हणून पुकारण्यात आलेला बंद हा केवळ चार तासांसाठी राहणार आहे. वाहनचालकांची गैरसोय होऊ नये, याची काळजी घेत काही तासांच्या बंदची हाक देण्यात आली आहे. याला पंपमालकांनी प्रतिसाद दिला आहे. ग्राहकांनी गैरसोय टाळण्याच्या उद्देशाने शक्य ती काळजी घेत पेट्रोल दुपारी बारा वाजतापूर्वी भरून घ्यावे, असे आवाहन करण्यात आले आहे.