शेअर ब्रोकरकडून पिस्तूल व काडतुसे जप्त
नागपूर : जरीपटका पोलिसांनी शेअर ब्रोकर व त्याच्या साथीदाराकडून देशी बनावटीचे पिस्तूल व पाच जिवंत काडतुसे जप्त केली. अजय पतीराम शर्मा (वय ४५, रा. देवीनगर) व मनीष नरेश मेश्राम (वय ३५, रा. रिपब्लिकननगर), अशी अटकेतील आरोपींची नावे आहेत. शर्मा हा शेअर ब्रोकर असून, मनीष याच्याविरुद्ध मारहाणीचे दोन गुन्हे दाखल आहेत. मनीष व अजय पिस्तूल विकण्याच्या तयारीत असल्याची माहिती जरीपटका पोलिसांना मिळाली. पोलिस उपायुक्त हर्ष पोद्दार यांच्या मार्गदर्शनाखाली वरिष्ठ पोलिस निरीक्षक पराग पोटे, निरीक्षक दिलीप लांगडे, उपनिरीक्षक संजय चप्पे, हेडकॉन्स्टेबल बंडू कळंबे, शिपाई रोशन तिवारी, प्रकाश बाळबुधे, लक्ष्मण चवरे यांनी पाटणकर चौकात सापळा रचून दोघांना अटक केली. त्यांच्याकडून पिस्तूल व पाच काडतुसे जप्त केली. दोघांची एक दिवस पोलिस कोठडी घेण्यात आली आहे. शर्मा हा आधी मार्केटिंगचे काम करीत होता. हिंगणघाट येथे त्याची कंड्या नावाच्या गुन्हेगारासोबत ओळख झाली. त्याने पिस्तूल व काडतुसे दिली. सध्या पैशाची गरज असल्याने आपण मनीष याच्या माध्यमातून पिस्तूल विकण्याच्या तयारीत होतो,असे त्याने सांगितले. पोलिस कंड्याचा शोध घेण्यासाठी हिंगणघाटला गेले आहे.
---
कॅप्शन- अटकेतील शेअर ब्रोकर व त्याच्या साथीदारासह जरीपटका पोलिस. जप्त पिस्तूल व काडतुसे.
---