​ माओवाद्यांच्या बालेकिल्ल्यावर घाव

म. टा. वृत्तसेवा, गडचिरोली

अबुझमाडच्या जंगलातील शिबिर उद्‍ध्वस्त करीत गडचिरोली पोलिसांनी माओवाद्यांच्या बालेकिल्ल्यावरच घाव घातला. कुमनार भागात उडालेल्या चकमकीत चार माओवादी जखमी झाल्याची शक्यता वर्तविण्यात आली आहे. नॅशनल पार्क इंद्रावती कंपनीच्या माओवाद्यांसोबत ही बैठक सुरू होती. यात माओवाद्यांचा दंडकारण्यातील मोठा नेता असलेला केंद्रीय समिती सदस्य भूपती उर्फ मल्लोजुला वेणूगोपाल याची उपस्थित असण्याची शक्यता व्यक्त होत आहे.

गडचिरोली जिल्ह्याला छत्तीसगडची सीमा लागून आहे. या सीमेलगत माओवाद्यांचा बालेकिल्ला असलेला अबुझमाडचा परिसर आहे. भामरागड तालुक्यातील लाहेरी, बिनागुंडा परिसरातून अबुझमाडमध्ये प्रवेश करता येते. पोलिस अधीक्षक डॉ. अभिनव देशमुख यांना लाहेरीपासून २० किमी अंतरावरील छत्तीसगडच्या हद्दीत माओवाद्यांच्या मोठ्या हालचाली असल्याची माहिती मिळाली. माओवादविरोधी अभियानाचे अतिरिक्त अधीक्षक डॉ. महेश्वररेड्डी यांच्या नेतृत्वात पन्नास सी-सिक्स्टी कमांडोचे पथक अभियानावर गेले. शनिवारी त्यांनी लाहेरी परिसरातून प्रवेश केला. कुमनार भागात पोहचताच माओवाद्यानी पोलिसांवर गोळीबार सुरू केला. तीन तासाच्या चकमकीनंतर माओवादी पळून गेले.
माओवाद्यांसाठी भौगोलिकृष्ट्या अनुकूल असलेल्या अशा भागात पोलिसांना आढळलेल्या शिबिरासाठी बांबू टाकून बनवलेले शिबिर दिसून आले. तिथे ५०हून अधिक माओवादी उपस्थित होते. या भागात निबू (नॅशनल पार्क इंद्रारती) या कंपनीचे लोकेशन असते. ही कंपनी तमय्या कंपनी कमांडरच्या नेतृत्वात बिजापूर, नारायणपूरसह गडचिरोलीच्या दक्षिण भागात फिरत असते. शहीद सप्ताहानंतर माओवाद्यांनी स्वातंत्र्यदिनाच्या पार्श्वभूमीवर घातपात घडविण्याच्या दृष्टीने तयारी करण्यासाठी हे शिबिर लावल्याचाही अंदाज आहे.

बड्या नेत्यांसाठी घोड्यांचा वापर

घटनास्थळावरून पोलिसांनी सहा घोडे, तीन बंदुका आणि इतर साहित्य जप्त केले आहेत. यानिमित्ताने माओवाद्यांचे वरिष्ठ नेते घोड्यांचा वापर करीत असल्यावर शिक्कामोर्तब झाले आहे. अबुझमाडमध्ये माओवाद्याचे मोठे नेते गणपती रामकिष्णासह भूपती, नर्मदक्का या साऱ्यांचे वास्तव्य आहे. वयाच्या दृष्टीने या नेत्यांना फिरणे अवघड जात असल्याने ते घोड्यांचा वापर करीत असल्याची माहिती पोलिस सूत्रांनी दिली आहे.

पहिल्यांदाच पोहचले पोलिस

भौगोलिकदृष्ट्या घनदाट जंगल असलेला हा भाग छत्तीसगडच्या नारायणपूर, बिजापूर जिल्ह्याच्या सीमेवरचा परिसर आहे. माओवादी या भागात स्वत:ची शेती करतात. माओवाद्यांच्या संघटनेसाठी लागणाऱ्या धान्याची त्या ठिकाणी साठवणूक केली जाते. छत्तीसगडचे बेद्रे पोलिस ठाणे या भागात असले तरी आजपर्यंत कुठल्याही पोलिसांनी या घटनास्थळी प्रवेश केलेला नाही. पहिल्यांदा गडचिरोली पोलिस दलाचे कमांडो डॉ. महेश्वर रेड्डीच्या नेतृत्वात तिथे शिरले.