दम मारो दम? पोलिस झोडतीन बम्म...

नागपूर : गुन्हेमुक्तनंतर नागपूर आता नशामुक्त शहरासाठी पोलिस आयुक्त अमितेशकुमार यांनी ठोस उपाययेजना आखली आहे. अमली पदार्थ तस्करांची मोठ्या प्रमाणात धरपकड सुरू असतानाच, दम मारणाऱ्यांविरुद्धही पोलिसांनी पावले उचलली आहेत. चिलमचा दम मारणाऱ्या नशेडींना पोलिस कोठडीत डांबण्यात येत आहे.

अमितेशकुमार यांनी वरिष्ठ पोलिस अधिकाऱ्यांची बैठक घेतली. नशामुक्त शहरासाठी अमली पदार्थ तस्करांबरोबरच त्याचे सेवन करणाऱ्यांविरूद्धही कारवाई निर्देश दिले. मैदाने, पडित घरे, जंगल आदी ठिकाणी मोठ्या प्रमाणात अमली पदार्थांचे सेवन केले जात असल्याने या ठिकाणांना 'टार्गेट' करण्याचे आदेशही आयुक्तांनी पोलिस अधिकाऱ्यांना दिले. आयुक्तांच्या मार्गदर्शनाखाली परिमंडळ तीनचे पोलिस उपायुक्त लोहित मतानी यांच्या नेतृत्वात दोन दिवसांपूर्वी नशामुक्त शहर मोहिमेला धडाकेबाज सुरुवात झाली. मतानी यांच्या नेतृत्वात तहसील पोलिस स्टेशनचे वरिष्ठ पोलिस निरीक्षक जयेश भांडारकर व त्यांच्या सहकाऱ्यांनी मोमिनपुऱ्यातील एमएलसी कॅन्टीन परिसर, तकिया दिवान शाह परिसर, बकरामंडी, रेल्वे गार्डलाइन आदी ठिकाणी छापे टाकले. पोलिसांनी गांजा व अमली पदार्थांचे सेवन करणाऱ्या १६ नशेबाजांना कोठडीत डांबले.

नशामुक्त उपराजधानीसाठी पोलिसांनी विशेष योजना आखली आहे. पोलिस आयुक्तांच्या मार्गदर्शनाखाली परिमंडळ तीनमधील सर्वच पोलिस स्टेशनअंतर्गत येणारी मैदाने, मोकळ्या जागा, पडित घरे आदींचा शोध घेण्यात येऊन त्यांची यादी तयार करण्यात आली आहे. याठिकाणी अमली पदार्थांचे सेवन होत असल्याची खात्री पटताच छापे टाकण्यात येतात. आतापर्यंत १६ जणांविरुद्ध कारवाई करण्यात आली. त्यापैकी चारजण गुन्हेगारी पार्श्वभूमीचे असल्याचे आढळून आले, अशी माहिती परिमंडळ तीनचे पोलिस उपायुक्त लोहित मतानी यांनी दिली.

या नशेबाजांविरुद्ध कारवाई

मोहिमेंतर्गत मोहम्मद यासीन अहमद अली अन्सारी, सय्यद कासिफ अली अब्दुल हनिफ अन्सारी (दोन्ही रा. मोमिनपुरा), कासिफ ऊर्फ सलमान रेहमान अन्सारी (रा.भानखेडा), मोहम्मद खातीब अब्दुल गफुर (रा. तकिया दिवानशाह), मोहम्मद आतिक मोहम्मद रफिक, अकबर अली सत्ता अली, विकास चिलाटे, अब्दुल सलाम अब्दुल इसार, मोहम्मद रफिक अब्दुल सकुर, समशेर खान इस्माइल खान, मोहम्मद खालीद अन्सारी हनिफ अन्सारी, मोहम्मद अजिज मोहम्मद रफिक, मोहम्मद नदीम अन्सारी मोहम्मद सलीम अन्सारी, दिलशाहू अहमद अन्सारी सिराजउद्दीन अहमद अन्सारी व शेख बब्बू शेख रसूल या नशेबाजांना अटक करण्यात आली.

कुख्यात गुन्हेगारही आढळले

कारवाईत कुख्यात गुन्हेगारही अमली पदार्थांचे सेवन करताना आढळून आले. मोहम्मद यासीन हा प्राणघातक हल्ल्याच्या गुन्ह्यातील आरोपी आहे. कासिफ हा तस्कर असून त्याला तडीपारही करण्यात आले होते. मोहम्मद खातीबविरुद्धही शारीरिक दुखापतीचे गुन्हे दाखल आहेत. मोहम्मद आतिक चोरटा आहे.