म.टा. प्रतिनिधी, नागपूर
दारूबंदी असलेल्या चंद्रपूर जिल्ह्यात दारूची तस्करी करणाऱ्या पोलिस मुख्यालयात तैनात पोलिस शिपायासह पाच जणांना मूल पोलिसांनी अटक केली आहे. त्यांच्याकडून मोठ्या प्रमाणात मद्यसाठा व दोन कार जप्त करण्यात आल्या. पोलिस शिपाई परवेज इशाद बाळापुरे (वय ३२, रा.धरमपेठ), भूषण अशोक डुंभरे (वय २६, देशपांडे लेआऊट), प्रकाश प्रमोद रंगारी (वय २४), विजय बाबूराव तायवाडे (वय २९) व हर्षल विनोद मोटघरे (२८) अशी अटकेतील तस्करांची नावे आहेत.
नागपुरातील काही जण मूलमार्गे चंद्रपूर येथे दारू घेऊन जात असल्याची माहिती मूल पोलिस स्टेशनचे ठाणेदार सतीशसिंग राजपूत यांना मिळाली. शुक्रवारी रात्री राजपूत यांच्या मार्गदर्शनाखाली सहायक पोलिस निरीक्षक मनोज गदादे व त्यांच्या सहकाऱ्यांनी चामोर्शी नाक्याजवळ सापळा रचला. एम.एच. ४०- एटी- ८१७१ व एम.एच.४०-एटी-८१९९ या क्रमांकाच्या कारला पोलिसांना थांबविले. दोन्ही कारची झडती घेतली असता त्यामध्ये साडे तीन लाखांची विदेशी दारू आढळली. दारू तस्करीत पोलिस कर्मचाऱ्याला अटक करण्यात आल्याची माहिती पोलिस अधीक्षक कार्यालयात देण्यात आली आहे. अधीक्षक कार्यालय नागपूर पोलिसांना या घटनेचा अहवाल पाठविणार आहे. अटकेतील तस्करांची सोमवारपर्यंत पोलिस कोठडी घेण्यात आली आहे. ही दारू कोणाला पोहोचविण्यात येणार होती, याचा शोधही मूल पोलिस घेत आहेत.