म. टा. विशेष प्रतिनिधी, नागपूर
करोनामुळे देशभरात लॉकडाउन असल्याने एरवी सकाळपासून दरबार भरवणाऱ्या नेत्यांवर 'पॉलिटिक्स फ्रॉम होम'ची अर्थात फोनवरच संपर्क साधण्याची वेळ आली आहे. यात राजकारण कमी, तर मदतकार्याबाबत अधिक चर्चा करण्यात येत आहे.
करोनामुळे सर्व घडामोडी थांबल्या आहेत. राज्यकर्त्यांकडून मदतकार्यासाठी योग्य त्या सूचना देऊन आवश्यक काळजी घेतली जात आहे. विरोधी पक्षाचे लोकप्रतिनिधी व नेतेही स्वस्थ बसलेले नाहीत. आपआपल्या क्षेत्रात गरजूंना मदत पोहोचवण्याचे प्रयत्न सुरू आहेत. संपर्कातील लोकांशी विचारपूस करण्यात येत आहे. बड्या नेत्यांकडे एखाद-दोन इतर नेते वा कार्यकर्ते भेट देत आहेत. मात्र, त्यातही सुरक्षित अंतर ठेवण्याची खबरदारी घेतली जात आहे. शहरातील मदतकार्याबाबत काँग्रेसने स्थानिक पदाधिकाऱ्यांची बैठक घेतली, तर केंद्रीय मंत्री नितीन गडकरी यांनी त्यांच्या निवासस्थानी पक्षाचे प्रमुख नेते खासदार, आमदारांशी चर्चा करून स्थिती जाणून घेतली तसेच मदतकार्याबाबत आवश्यक सूचना केल्या.
करोनाची भीषणता लक्षात येण्यापूर्वी सर्व व्यवस्थित सुरू होते. विधिमंडळाच्या अर्थसंकल्पीय अधिवेशनापासून ते स्थानिक पातळीवर बैठका मेळावे चालले. राज्यसभा व विधान परिषदेसाठी मोर्चेबांधणी करण्यात आली. राज्यसभेचे चित्र स्पष्ट होताच, इच्छुकांनी विधान परिषदेवर लक्ष केंद्रित केले. नागपूर विभाग पदवीधर मतदारसंघ, राज्यपाल नियुक्त सदस्यांसाठी मोर्चेबांधणीला वेग आला होता. पदवीधर मतदारसंघात जनसंपर्काच्या माध्यमातून अप्रत्यक्ष प्रचार सुरू होता. काँग्रेससह विविध पक्षांनी मतदार नोंदणीवर लक्ष केंद्रित केले होते. मात्र, मार्चच्या तिसऱ्या आठवड्यात या सर्व घडामोडी व हालचालींना ब्रेक लागले.
लॉकडाउन करण्याची वेळ येईल, याची अनेकांना कल्पना नसल्याने बऱ्याच नेत्यांनी कार्यक्रम निश्चित केले होते. ते सर्व कार्यक्रम रद्द करण्यात आले. विधान परिषदेचे इच्छुक फोनद्वारे मुंबई, दिल्लीतील नेत्यांच्या संपर्कात आहेत तसेच, प्रबळ दावेदारांना स्थानिक पातळीवर निवडणूक प्रक्रियेत सहभागी असलेल्यांशीही संपर्क ठेवला आहे. विविध पक्षाचे प्रमुख आपआपल्या कार्यकर्त्यांना मदतकार्यासाठी योग्य सूचना देऊन आढावा घेत आहेत. आमदार, माजी मंत्री, आमदारांनी मतदारसंघावर घरूनच लक्ष दिले आहे. महापालिकेच्या निवडणुकीला वेळ असला तरी विद्यमान नगरसेवक व इच्छुकांनी वॉर्ड, प्रभागात पक्षाचे वा स्वतःच्या गटाचे कार्यकर्ते व समर्थकांशी समन्वय साधण्याचा प्रयत्न केला आहे. त्यामुळे सद्यस्थितीत करोनावर लक्ष केंद्रित करत 'पॉलिटिक्स फ्रॉम होम'वर नेत्यांनी भर दिल्याचे दिसून येते.
........