'पोर्टोगोमेझ'च्या व्यवस्थापकाला लुटले
-वेटरला गोव्यातून नाट्यमय अटक
नागपूर : 'जॅक्स स्पॅरो'च्या अभिनयातील साखळी चित्रपटांची मालिका 'पायरेट्स ऑफ दि कॅरिबियन' जगभर प्रसिद्ध आहे. अशाच साहसी 'दर्यावर्दी' चित्रपटातून प्रेरणा घेत पोर्टोगोमेझ या जहाजाची प्रतिकृती असलेल्या नागपुरातील पोर्टोगोमेझ हॉटेलचा कारभार सांभाळणाऱ्या व्यवस्थापकाला लुटणारा ओळखीचाच असल्याचा उलगडा अंबाझरी पोलिसांनी केला. पोलिसांनी वेटरला गोवा येथे अटक केली. राम ऊर्फ राजेश लखन चौहान (रा. गोवा) असे अटकेतील चोरट्याचे नाव आहे. योगायोग म्हणजे हा चोरटा समुद्रकिनारीच सापडला. पोलिसांनी दिलेल्या माहितीनुसार, अजय बेदमित्र शर्मा (वय ६०,रा.वर्मा ले-आऊट) हे हॉटेलमध्ये व्यवस्थापक आहेत. काही महिन्यांपूर्वी राम हा हॉटेलमध्ये काम करीत होता. त्यामुळे तो शर्मा यांच्या ओळखीचा होता. ३ सप्टेंबरला राम हा अजय यांच्या घरी आला. रात्री शर्मा यांच्या घरीच थांबला. मध्यरात्री त्याने शर्मा यांच्याकडील सुमारे सव्वा लाखांची रोख व अन्य साहित्य असा एकूण अडीच लाखांचा ऐवज चोरी केला व सकाळी पसार झाला. शर्मा यांनी अंबाझरी पोलिसांत तक्रार दिली. वरिष्ठ पोलिस निरीक्षक बी.एस.खणदाळे यांच्या मार्गदर्शनाखाली पोलिस उपनिरीक्षक पी.आर.पाटणकर, सहायक पोलिस उपनिरीक्षक दीपक अवचट, श्रीकांत उईके, अंकुश घटी व त्यांच्या सहकाऱ्यांनी तपास सुरू केला. मोबाइल 'लोकेशन'द्वारे राम याला गोवा येथे अटक केली. त्यांच्याकडून रोख, मोबाइल व घड्याळीसह दीड लाखांचा ऐवज जप्त केला.
बॉक्स
चोरीच्या पैशातून मोबाइल
राम याच्या वडिलाचे निधन झाले आहे. त्याची आई मनोरुग्ण आहे. तो एकटाच राहतो. तो नागपुरात हॉटेलमध्ये काम करीत होता. एक महिना त्याने पोर्टोगोमेझमध्येही काम केले होते. शर्मा यांच्याकडील चोरीच्या पैशातून त्याने मोबाइल खरेदी केल्याचेही तपासादरम्यानसमोर आले आहे.