-सिमेंट रस्त्यांसाठी प्रि-फॅब्रिकेटेड ब्लॉक्स
म.टा. विशेष प्रतिनिधी, नागपूर
शहरातील सिमेंट रस्त्यांसाठी प्रि-फॅब्रिकेटेड ब्लॉक्स तयार करण्याचा प्रयोग सुरू झाला आहे. रिंग रोडवरील ३०० मीटरच्या पट्ट्यावर पहिला प्रयोग करण्यात येईल. बांधकाम विभाग यात यशस्वी झाल्यास काँक्रिट रस्त्यांच्या कामामुळे होणाऱ्या त्रासापासून नागरिकांना मुक्ती मिळेल.
व्हीएनआयटीतील एका मार्गावर करण्यात आलेल्या या प्रयोगाला यश आल्यानंतर आता प्रत्यक्ष रिंग रोडवरील काम या ब्लॉकद्वारे करण्यात येईल. अन्य ठिकाणी प्रि-फॅब्रिकेटेड ब्लॉक्स तयार करून रस्त्यावर लावण्यात येतील. या ब्लॉकमुळे दर्जेदार काम होईल. तसेच, विविध अडचणी दूर होतील. प्रदूषणाला आळा बसेल आणि नागरिकांना कामाचा त्रास होणार नाही. या पद्धतीने रस्त्यांची कामे पंधरवड्यात पूर्ण होतील, असा विश्वास केंद्रीय रस्ते वाहतूक मंत्री नितीन गडकरी यांनी आयआरसीशी संबंधित पत्रकार परिषदेत व्यक्त केला.
विकास आणि तंत्रज्ञानाबाबत नागपूर मॉडेल म्हणून उदयास येत आहे. शहरात एक कोटी चौरस फूट व्यावसायिक क्षेत्र विकसित करण्यात येत आहे. देशात अशा प्रकारचे पहिल्यांदाच काम होणार आहे. यातील अनेक गोष्टी आयकॉन ठरतील. उपराजधानीत सुरू असलेल्या विविध विकासकामांसाठी अत्याधुनिक तंत्रज्ञानासोबतच प्रकल्पावरील खर्च कमी व्हावा, यासाठी अनेक प्रयोग राबवण्यात येत आहेत. त्यामुळे सरकारी पैशाचीदेखील बचत होणार आहे. मेट्रो रेल्वेने बांधलेल्या स्टेशनचे फ्रान्स व जर्मनीच्या राजदूतांनी कौतुक केल्याचे नितीन गडकरी यांनी आवर्जुन सांगितले.
मेट्रोला विकासकामाची जबाबदारी सोपवण्यावर आक्षेप घेण्यात येत असल्याकडे लक्ष वेधले असता, यातून शहराचे नुकसान होणार नाही. मेट्रोच्या पहिल्या टप्प्याचे काम नऊ हजार कोटी रुपये आणि दुसऱ्याचे टप्प्याचे एकूण काम १८ हजार कोटी रुपयांचे आहे. महापालिकेने पाच टक्के निधी द्यावा, ही अट आहे. त्यामुळे महापालिकेचा हिस्सा ९०० कोटी रुपये होतो. महापालिका नऊ रुपये देऊ शकत नाही, अशी बिकट आर्थिक स्थिती आहे. यासाठी महापालिकेच्या जागांचा विकास करून मेट्रो हा प्रश्न सोडवणार असल्याचे गडकरी यांनी स्पष्ट केले.
पंधरवड्यात तोडणार रेल्वे स्थानकासमोरील उड्डाणपूल
स्टिल फायबर तयार काँक्रिटमध्ये टाकल्यास खर्चात ३० टक्के बचत होते. यासाठी रवी सिन्हा यांच्या अध्यक्षतेखाली तज्ज्ञांची एक समिती स्थापन करण्यात आली आहे. रेल्वे स्थानकासमोरील उड्डाणपूल येत्या पंधरवड्यात तोडण्यात येईल. लोखंडी पूल आणि रामझुल्याच्या परिसराचाही आधुनिक तंत्रज्ञानाने विकास करण्यात येणार आहे.
हायवे इंजिनीअर्स संस्था
नोएडा येथे मुख्यालय असलेल्या इंडियन अकादमी ऑफ हायवे इंजिनीअर्सची शाखा नागपुरात सुरू करण्यात येत आहे. या संस्थेमुळे शहरात आणखी एक नामांकित संस्था येईल. विद्यार्थ्यांना तांत्रिक शिक्षणासाठी या संस्थेची मदत होईल, असे केंद्रीय मंत्री नितीन गडकरी यांनी सांगितले.
गडचिरोलीत अॅव्हिएशन फ्यूएल हब
गडचिरोली येथे अॅव्हिएशन फ्यूएल हब करण्याचे प्रयत्न सुरू आहेत. बांबूपासून इंधन तयार होऊ शकते. गडचिरोलीसह विदर्भात जट्रोफा, रतनज्योतसारखी मोठ्या प्रमाणात वन संपदा आहे. त्याचा फायदा बायोफ्यूएलसाठी होईल. बांबूपासून तयार केलेले जैवइंधन देहराडून येथील संशोधन संस्थेकडे चाचणीसाठी पाठवले आहेत. नागपुरातील ठाकरे यांनी हा प्रयोग केला आहे. या इंधनाद्वारे विमानदेखील चालू शकते. अलीकडेच जैवइंधनाचे काही प्रमाण असलेल्या एका विमानाने यशस्वी उड्डाण पूर्ण केल्याची माहिती केंद्रीय मंत्री नितीन गडकरी यांनी यावेळी दिली.