-३ सप्टेंबर रोजी विविध कार्यक्रमांचे आयोजन
म.टा. प्रतिनिधी, नागपूर
आंतरराष्ट्रीय कृष्ण भावनामृत संघाच्यावतीने (इस्कॉन) जन्माष्टमी महोत्सव ३ सप्टेंबर रोजी साजरा करण्यात येणार आहे. आयटी पार्कजवळील श्री राधा गोपीनाथ मंदिरात कार्यक्रमाचे आयोजन करण्यात आले आहे. इस्कॉनचे संस्थापक ए. सी. भक्तीवेदांत स्वामी प्रभुपाद यांचे शिष्य त्रिदण्डी स्वामी श्रील लोकनाथ स्वामी महाराज यांच्या यावेळी उपस्थित राहणार आहे.
जन्माष्टमी महोत्सवाच्या तयारीसाठी नुकतीच मिहान येथील इम्पेरियन टाउनशीप येथे बैठक घेण्यात आली. लोकनाथ स्वामी महाराज यांच्या अध्यक्षतेखाली घेण्यात आलेल्या बैठकीत स्वेतदीप दास, बुद्धिमन्त दास, बृज विलास दास, हरी कीर्तन दास, केशव दास, सुंदरलाल दास, गौर कृष्ण दास, कृष्णभक्त दास, अभिराम ठाकुर दास, अक्रूर दास, अनंतशेष दास, उद्धव दास आदी उपस्थित होते.
असा असेल महोत्सव
इस्कॉन नागपूरचे उपाध्यक्ष विशालदास यांनी यावेळी महोत्सवाची माहिती दिली. जन्माष्टमीचा कार्यक्रम सायंकाळी ६ वाजता होणार आहे. यावेळी भजनही सादर करण्यात येणार आहे. इस्कॉन भक्त कृष्ण लीलावर आधारित नाटिका सादर करणार आहे. रात्री ८ वाजता महाअभिषेक, रात्री १० वाजता लोकनाथ स्वामी महाराज यांचे कीर्तन होणार आहे. रात्री १२ वाजता भोग अर्पण करून महाआरती होणार आहे. ५ एकर परिसरात १६० फूट उंचीचे लोट्स टेम्पल बनेल. तिसऱ्या मजल्यावर राधा गोपीनाथ यांचे मंदिर असेल अशी माहिती इस्कॉनचे प्रवक्ता डॉ. श्यामसुन्दर शर्मा यांनी दिली.