विनाकारण फिरणाऱ्या १३ नागरिकांना शिक्षा

नागपूर : संचारबंदी व जमावबंदीचे आदेश धुडकावून अवहेलना करणाऱ्या आणखी १३ नागरिकांना न्यायालयाने प्रत्येकी ७०० रुपये दंडाची शिक्षा ठोठावली. हे सर्व नागरिक हिंगणा पोलिस स्टेशनच्या हद्दीतील रहिवासी आहेत. यापूर्वी एमआयडीसीत अशाप्रकारचे गुन्हे दाखल असलेल्या ११ नागरिकांना दंडाची शिक्षा ठोठावण्यात आली आहे. बजरंग काळे, बाबाराव दांडेकर, विजयकुमार यादव, सुधाकर धुरिया, अशोक शाक्य, अजमल खान, अजित बोपचे, वैभव दाभेकर, बलराज भगत, अमर गायकवाड, संतोष शाह, राजू पटले व घनश्याम खोब्रागडे अशी शिक्षा ठोठावण्यात आलेल्या नागरिकांची नावे आहेत.

संचारबंदी व जमाबंदीदरम्यान हिंगणा पोलिस स्टेशनचे वरिष्ठ पोलिस निरीक्षक सारिन दुर्गे व त्यांच्या सहकाऱ्यांनी या नागरिकांविरुद्ध गुन्हे दाखल केले. गुन्हे दाखल असलेल्या नागरिकांविरुद्ध न्यायालयात आरोपपत्र दाखल केले. दोषी आढळल्याने न्यायालयाने सर्वांनी प्रत्येकी ७०० रुपये दंडाची शिक्षा ठोठावली. शिक्षा झालेल्या नागरिकांना व्हिसा व शासकीय लाभ मिळण्यात अडचणी येणार आहेत.