म. टा. विशेष प्रतिनिधी, नागपूर
वाहतुकीची कायम कोंडी अनुभवणाऱ्या व अनेक वर्षांपासून तयार होत असलेल्या रामझुल्याच्या दुसऱ्या टप्प्याचे लोकार्पण वर्षारंभी जानेवारीत करण्याचे निर्देश केंद्रीय मंत्री नितीन गडकरी यांनी दिले. सध्या केवळ किरकोळ कामे असून, महिनाभरात ते पूर्ण होणार असल्याने २०१९ मध्ये तो वाहतुकीस मोकळा होईल. यासोबतच जयप्रकाशनगर मेट्रो स्थानकाला लागून महामेट्रो ऑरेंजसिटी-मेट्रो मॉलचे भूमिपूजन १९ जानेवारीला घेण्याचे निर्देश दिले. आगामी काळातील निवडणुका बघता शासकीय कागदोपत्री विविध मंजुरीसाठी अडलेले शहरातील सर्व 'ड्रीम प्रोजेक्ट'मधील अडचणी तातडीने दूर करा व फेब्रुवारी २०१९ पूर्वी या सर्व प्रस्तावित प्रकल्पांचे भूमिपूजन आटोपून घेण्याचे अप्रत्यक्ष निर्देशच गडकरींनी दिले.
नागपूर शहरातील विविध प्रस्तावित कामांची सद्यस्थिती जाणून घेण्यासाठी केंद्रीय परिवहनमंत्री नितीन गडकरी यांच्या अध्यक्षतेखाली सोमवार, २४ डिसेंबरला 'वनामती' येथे बैठकीचे आयोजन केले होते. बैठकीला पालकमंत्री चंद्रशेखर बावनकुळे, महापौर नंदा जिचकार, आमदार सुधाकर कोहळे, आमदार कृष्णा खोपडे, उपमहापौर दीपराज पार्डीकर, स्थायी समितीचे सभापती वीरेंद्र कुकरेजा, माजी महापौर प्रवीण दटके, महामेट्रोचे अध्यक्ष तथा व्यवस्थापकीय संचालक ब्रजेश दीक्षित, विभागीय आयुक्त संजीवकुमार, जिल्हाधिकारी अश्विन मुदगल, मनपा आयुक्त अभिजीत बांगर, मध्य रेल्वेचे डीआरएम एम. एस. उप्पल, मनपाचे अतिरिक्त आयुक्त रवींद्र ठाकरे, अतिरिक्त आयुक्त राम जोशी, सार्वजनिक बांधकाम विभागाचे मुख्य अभियंता उल्हास देबडवार, सार्वजनिक बांधकाम विभाग (महामार्ग)चे अधीक्षक अभियंता ठेंग, नागपूर स्मार्ट ॲण्ड सस्टेनेबल सिटी डेव्हलपमेंट कॉर्पोरेशन लि.चे मुख्य कार्यकारी अधिकारी डॉ. रामनाथ सोनवणे, राष्ट्रीय महामार्ग प्राधिकरणचे एम. चंद्रशेखर उपस्थित होते.
सर्वप्रथम गडकरी यांनी केंद्रीय मार्ग निधीअंतर्गत सुरू असलेल्या कामांची सद्यस्थिती जाणून घेतली.
जुना भंडारा रोड-मेयो हॉस्पीटल ते सुनील हॉटेलपर्यंतच्या रस्त्याचे रुंदीकरण, तेथील भूसंपादनाची सद्यस्थिती, केळीबाग रोड रुंदीकरण आणि भूसंपादनाबाबतची सद्यस्थिती, जयस्तंभ चौक ते मानस चौक रस्त्याच्या विकासाचा प्रस्ताव, वंजारीनगर पाण्याची टाकी ते अजनी रस्त्याला जोडणारा डी. पी. रोड आदींमधील अडचणी तातडीने दूर करून जानेवारी महिन्यापर्यंत भूसंपादन कार्यवाही पूर्ण होऊन प्रत्यक्ष कामाला सुरुवात करण्याचे निर्देश त्यांनी दिले.
नागपूर शहरात विविध ठिकाणी रेल्वे उड्डाण पुलाची जी कामे रेल्वे विभागाच्या आडकाठीमुळे अडलेली आहेत, त्यातील अडथळा रेल्वेच्या अधिकाऱ्यांनी सार्वजनिक बांधकाम विभागाच्या अधिकाऱ्यांसोबत बैठक घेऊन तातडीने दूर करण्याचे निर्देश देण्यात आले. नागनदी पुनरुज्जीवन प्रकल्पाबाबत मनपा आयुक्त अभिजीत बांगर यांनी माहिती दिली. सप्टेंबर २०१९ पर्यंत जपानी कंपनी जिकाकडून मिळणाऱ्या कर्ज करारावर स्वाक्षरी होऊन डिसेंबर २०१९ मध्ये प्रत्यक्ष कामाला सुरुवात होईल, अशी माहिती आयुक्तांनी दिली.
महाल बुधवार बाजाराचे डिझाइन मंजूर
नागपूर शहरातील भाजी मार्केट, बुधवार बाजार महाल, सोमवारी पेठ सक्करदरा, नेताजी मार्केट, मच्छी मार्केट आदींचाही आढावाही गडकरींनी घेतला. यावेळी महाल बुधवार बाजारच्या डिझाइनचे सादरीकरण झाले. या डिझाइनला त्यांनी मंजुरी देत पुढील प्रक्रिया तातडीने करण्याचे निर्देश दिले. सक्करदरा बुधवार बाजाराचे डिझाइन नामवंत आर्किटेक्टकडून तयार करण्याच्या सूचनाही त्यांनी दिल्या.
पारडी उड्डाणपुलाचे ३० टक्केच काम
राष्ट्रीय महामार्ग प्राधिकरणतर्फे सुरू असलेल्या विविध कामांप्रती गडकरी यांनी नाराजी व्यक्त केली. पारडी येथील उड्डाणपुलाचे काम बरेच रेंगाळले आहे. चार वर्षांत केवळ ३० टक्के काम झाल्याचा आरोप आमदार कृष्णा खोपडे यांनी केला. भूसंपादनाच्या कार्यातील अडथळे दूर करून या कामाला गती देण्याचे निर्देश देत, वाडी येथील उड्डाणपुलाच्या प्रक्रियेलाही सुरुवात करण्याचे निर्देश त्यांनी दिले.
......