नागपूर : सेवानिवृत्तांबाबत सर्वोच्च न्यायालयाने दिलेल्या आदेशाची त्वरित अंमलबजावणी व्हावी, या मागणीसाठी देशभरातील निवृत्तीधारक बुधवार, २४ ऑक्टोबर रोजी मुंबईतील आझाद मैदान येथे धरणे आंदोलन करणार आहेत. ईपीएस-९५ संयुक्त कृती समितीची पुणे येथे अलीकडेच कॉ. देवराव पाटील यांच्या अध्यक्षतेखाली सभा झाली. या सभेस समितीचे राष्ट्रीय अध्यक्ष प्रकाश एंडे, निवृत्त कर्मचारी समन्वय समितीचे महासचिव प्रकाश पाठक, ऑल इंडिया पेन्शनर्स फेडरेशन केरळचे उपाध्यक्ष जेकब, हिंदुस्थान पेट्रोलियमचे केंद्रीय अध्यक्ष जोशी, महाराष्ट्र राज्य कृती समितीचे कॉ. अतुल दिघे, कॉ. वाईकर, अॅड. सुभाष कुळकर्णी, गोडसे, एम. आर. जाधव सहभागी झाले होते. देशात जवळपास १.२४ कोटी सेवानिवृत्त आहेत. संसदेच्या उच्चाधिकार समितीला आता मुदतवाढ देऊ नये, समितीचा अहवाल लवकरात लवकर सादर व्हावा, कोशियारी समितीच्या शिफारशीचीं अंमलबजावणी व्हावी, असे ठराव या सभेत पारित करण्यात आले.
...
महापारायण सोहळा
नागपूर : मातृशक्तीतर्फे १८ नोव्हेंबर रोजी जागृत शिव हनुमान मातृशक्तीधाम, कळमना टाकळी, उमरेड रोड येथे संतकवी चंद्रशेखर वराडपांडे रचित महाशक्ती अनसुया माता चरित्रग्रंथाचे महापारायण होणार आहे. सकाळी ११ वाजता महापारायणाला प्रारंभ होईल. दुपारी २ वाजता महाप्रसादाला केंद्रीय मंत्री नितीन गडकरी उपस्थित राहतील. महापारायण सोहळ्यात सहभागी होण्यासाठी रेशीमबाग येथील श्री गजानन महाराज श्रद्धास्थान येथे संपर्क साधावा, असे आवाहन करण्यात आले आहे.
...
पशुबळी बंदीचे स्वागत
नागपूर : कोराडी येथील महालक्ष्मी मंदिरात पशुबळीवर बंदी घालण्याच्या निर्णयाचे महाराष्ट्र अंधश्रद्धा निमूर्लन समितीने स्वागत केले आहे. समितीने गेल्या अनेक वर्षांपासून ही मागणी लावून धरली होती. त्याचप्रमाणे नवरात्राच्या काळात या मंदिरात हजारो अखंड ज्योती प्रज्वलित केल्या जातात. त्यात लाखो लिटर खाद्यतेल नष्ट होते. त्यामुळे ही प्रथाही बंद करण्याची मागणी होती. पालकमंत्री चंद्रशेखर बावनकुळे यांनी या दोन्ही प्रथा बंद करण्याचा निर्णय घेतल्याबद्दल समितीच्या पदाधिकाऱ्यांनी पालकमंत्र्यांची भेट घेऊन अभिनंदन केले. यावेळी महाराष्ट्र अंधश्रद्धा निर्मूलन समितीचे जिल्हा प्रधान सचिव गौरव आळणे, कोराडी शाखाध्यक्ष डॉ. गणेश सोरमारे, उपाध्यक्ष बबनराव द्रवेकर, गणेश कांबळे, दिलीप येवले उपस्थित होते.