म. टा. प्रतिनिधी, नागपूर
निवृत्तीवेतन तसेच कुटुंब निवृत्तीवेतन सुधारित करून ३१ डिसेंबर २०१८ पर्यंतच्या कालावधीतील थकबाकीची रक्कम शासन निर्णयानुसार पाच समान हप्त्यात प्रत्येक वर्षीच्या जून महिन्याच्या निवृत्तीवेतनासोबत आणि १ जानेवारी २०१९ पासून देण्यात येणार असल्याचे प्रशासनाकडून सांगण्यात आले.
सातव्या वेतन आयोगाच्या शिफारशीनुसार, प्रशासनाकडून निवृत्तीवेतन धारकांना सूचना देण्यात आल्या आहेत. १ जानेवारी २०१६ पूर्वीचे तसेच १ जानेवारी २०१६ नंतर सेवानिवृत्त तसेच कुटुंब निवृत्तीवेतन घेणाऱ्या निवृत्तीवेतन धारकांचे निवृत्तीवेतन तसेच कुटुंब निवृत्तीवेतन सुधारित करण्यात येत आहे.
निवृत्तीवेतनधारकांना विवरणपत्र मिळावे, अशी मागणी करण्यात येत आहे. मात्र, उत्पन्नकर गणना करण्याचे काम करण्यात येत असल्याने फेब्रुवारी २०२० पर्यंत विवरणपत्र देणे शक्य नसल्याचे वरिष्ठ कोषागार अधिकारी कार्यालयाकडून सांगण्यात आले.
निवृत्त वेतनधारकांनी थकबाकी विवरणपत्राची मागणी फेब्रुवारी २०२० नंतर केल्यास विवरणपत्रे कोषागार कार्यालयाडून दिल्या जातील. तरी सर्व निवृत्ती वेतनधारक तसेच कुटुंब निवृत्तीवेतनधारकांनी नोंद घ्यावी, असे आवाहन वरिष्ठ कोषागार अधिकारी कार्यालयाकडून करण्यात आले.
..............