म. टा. प्रतिनिधी, नागपूर
रबरी ट्युबमध्ये मोहदारू लपवून जाणाऱ्या एका रिक्षाचालकावर राज्य उत्पादन शुल्क विभागाच्या पथकाने कारवाई केली. या रिक्षाचालकाकडून १०० लीटर क्षमतेचे तब्बल २५ रबरी ट्युब जप्त करण्यात आले. अडीच हजार लिटर मोहदारू जप्त करण्यात आली.
ऑटोरिक्षामध्ये मोहदारूची वाहतूक होत असल्याची माहिती राज्य उत्पादन शुल्क विभागाच्या निरीक्षकांना प्राप्त झाली. संगम ते हिंगणा मार्ग परिसरातील पेट्रोल पंपजवळ ऑटोरिक्षा संशयास्पद आढळून आला. उत्पादन शुल्क विभागाच्या चमूने या ऑटोरिक्षाचा पाठलाग करून रिक्षा जप्त केला. २५ रबरी ट्युब मोहदारूने भरले असल्याचे आढळून आले. वाहन चालक ईरफआन शेख वजीर, सोनू नीलू साटेकर या दोघांवर महाराष्ट्र दारूबंदी कायद्याच्या कलम ६५ (ए) (ई) व ८३ अंतर्गत कार्यवाही करून गुन्हा नोंदविण्यात आला. आरोपींकडून ३ लाख ७ हजार ५०० रुपयांचा मुद्देमाल जप्त करण्यात आला. उपायुक्त उषा वर्मा, अधीक्षक स्वाती काकडे यांच्या मार्गदर्शनाखाली ही कारवाई करण्यात आली. या कारवाईत राज्य उत्पादन शुल्क विभागाचे निरीक्षक एस. के. सहस्त्रबुद्धे, उपनिरीक्षक एम. पी. चिटमटवार, संजय राठोड, सुधीर मानकर, समीर सईद, देवेश कोटे आदींचा सहभाग होता.