सावनेर नगरपरिषदेत अभियंत्यासह दोघांना ACBने पकडले रंगेहाथ; २० हजारांची लाच घेतांना कारवाई

म.टा. प्रतिनिधी, नागपूर : प्रधानमंत्री आवास योजनेंतर्गत मंजूर घरासाठी धनादेशाकरिता २० हजारांची लाच घेणाऱ्या सावनेर नगरपरिषदेच्या अभियंत्यासह दोघांना लाचलुचपत प्रतिबंधक विभागाने (एसीबी) गुरुवारी दुपारी रंगेहाथ अटक केली.

अशी आहे घटना

तांत्रिक अभियंता नितीन विनायकराव मदनकर (वय ४१, रा. जुना बगडगंज) व विलास देवराव राऊत (वय ३८, रा. सावनेर) अशी अटकेतील लाचखोरांची नावे आहेत. मदनकर याच्याकडे आवास योजनेही काम आहे. ४५वर्षीय इसमाला प्रधानमंत्री आवास योजनेंतर्गत घर मंजूर झाले. तिसऱ्या टप्प्यातील धनादेश काढण्यासाठी मदनकरने विलासच्या माध्यमातून २५ हजारांची लाच मागितली. एवढी रक्कम देण्यास त्याने नकार दिला. २० हजार रुपये दिल्याशिवाय धनादेश काढणार नाही, असे मदनकरने सांगितले. तक्रारदाराने लाचलुचपत प्रतिबंधक विभागाकडे तक्रार केली.

अधीक्षक राहुल माकणीकर, अतिरिक्त अधीक्षक मधुकर गीते यांच्या मार्गदर्शनाखाली उपअधीक्षक योगिता चाफले, निरीक्षक वर्षा मते, आशिष चौधरी, शिपाई अनिल बहिरे, हर्षलता भरडकर यांनी सावनेरमध्ये सापळा रचला. २० हजारांची लाच घेताना आधी विलास व नंतर मदनकरला अटक केली. या वर्षातील सावनेर नगरपरिषदेतील एसीबीने केलेली ही तिसरी कारवाई होय.