म. टा. विशेष प्रतिनिधी, नागपूर
टाटा ट्रस्टच्या सहकार्याने मनपातर्फे संचालित नागरी प्राथमिक आरोग्य केंद्रातील सेवा उत्कृष्ट करण्यात आल्या आहेत. दारिद्र्यरेषेखालील परिवारातील रुग्णांसोबतच आता मध्यमवर्गीयांचाही ओढा मनपाच्या प्राथमिक आरोग्य केंद्राकडे वाढला आहे. मनपा पुरवित असलेल्या माफक दरातील उत्कृष्ट आरोग्य सेवेचे हे यश असल्याचे प्रतिपादन मनपाचे अतिरिक्त आयुक्त राम जोशी यांनी केले.
नागपूर मनपा आणि टाटा ट्रस्टनर्फे आरोग्य उपसंचालक डॉ. भावना सोनकुसळे यांच्या मार्गदर्शनात मंगळवारी हॉटेल सेंटर पॉइंट येथे 'नागपुरातील प्राथमिक आरोग्य केंद्रातील सेवा बळकटीकरण' या विषयावर भागधारकांच्या कार्यशाळेचे आयोजन केले होते. मंचावर मनपा उपायुक्त राजेश मोहिते, एम्सचे डॉ. प्रदीप देशमुख, लता मंगेशकर हॉस्पिटलचे संचालक डॉ. अमोल देशमुख, हेल्थ सिस्टीम ट्रान्सफॉर्मेशन प्लॅटफॉर्मचे (एचएसटीपी) मुख्य कार्यकारी अधिकारी राजीव सदानंद, केंद्र सरकारच्या आरोग्य आणि कुटुंब कल्याण मंत्रालयाच्या रक्षिता खनिजो, मनपाचे सहायक आरोग्य अधिकारी डॉ. विजय जोशी, टाटा ट्रस्टचे डॉ. अमर नवकर यांची उपस्थिती होती.
अतिरिक्त आयुक्त राम जोशी म्हणाले, भविष्यात नागपूरकडे 'हेल्थकेअर हब' म्हणून लोकांनी बघायला हवे. मनपाने टाटा ट्रस्टच्या माध्यमातून मनपाद्वारे संचालित २७ नागरी प्राथमिक आरोग्य केंद्राच्या सेवांमध्ये सुधारणा केली. उत्कृष्ट आणि दर्जेदार सेवा सुरू करण्यात आल्या आहेत. दारिद्र्यरेषेखालील लाभार्थ्यांसोबतच आता मध्यमवर्गीयांचा ओढाही या सेवेकडे वाढला आहे. दर्जेदार सेवा केल्या तर सेवा घेणाऱ्यांची संख्या आपोआपच वाढते. आज प्रत्येक आरोग्य केंद्रात सुमारे १५०-२०० रुग्ण आरोग्य सेवेचा लाभ घेतात, अशी माहिती त्यांनी दिली.
एम्सचे डॉ. प्रदीप देशमुख यांनी नागपूरमध्ये मिळत असलेल्या आरोग्य सेवांचे कौतुक केले. आरोग्य सेवांचा दर्जा नागपुरात दिवसेंदिवस वाढत आहे. याचा आनंद आहे. मात्र, आपातकालीन सेवा अधिक बळकट व्हायला हव्यात, अशी अपेक्षा त्यांनी व्यक्त केली. तत्पूर्वी केंद्र सरकारच्या आरोग्य व कुटुंबकल्याण मंत्रालयाच्या रक्षिता खनिजो यांनी सादरीकरणाच्या माध्यमातून आरोग्य सेवेमध्ये होत असलेल्या सुधारणांची माहिती दिली. आपल्याकडे आरोग्य सेवा वाढत आहेत. मात्र, त्याची माहिती लोकांपर्यंत पोहोचत नाही. त्यासाठी प्रयत्न होणे गरजेचे असल्याचे त्यांनी सांगितले.
सर्वसमावेशक प्राथमिक आरोग्य सेवा प्राप्त करणे हा या कार्यशाळेचा उद्देश आहे. टाटा ट्रस्टचे डॉ. टिकेश बिसेन यांनी कार्यशाळेची माहिती प्रास्ताविकातून दिली.
कार्यशाळेमध्ये शासकीय वैद्यकीय महाविद्यालय व रुग्णालयाच्या सामुदायिक आरोग्य विभागप्रमुख प्रामुख्याने उपस्थित होते. उद्घाटनानंतर दिवसभर विविध विषयांवर कार्यशाळेत मार्गदर्शन झाले. यामध्ये डॉ. एन. देवदासन यांनी प्राथमिक आरोग्य सेवा विषयावर, आरोग्य उपसंचालक डॉ. भावना सोनकुसळे यांनी सध्याच्या आरोग्य सेवा, टाटा ट्रस्टचे डॉ. अमर नवकर यांनी आदर्श नागरी प्राथमिक आरोग्य केंद्र प्रकल्पाबाबत माहिती दिली. गटचर्चेच्या माध्यमातून विविध विषयावर मंथन करण्यात आले.
......................