डी.के. लाउन्जमध्ये छापा; रशियन तरुणीसह तिघींची सुटका, चौघे गजाआड
म.टा. प्रतिनिधी, नागपूर
कोतवालीतील गुजरनगरमधील गॅस गोदाम परिसरात असलेल्या डी. के. रेस्टॉरंट अॅण्ड लाउन्जमध्ये सुरू असलेला देहव्यापार उघडकीस आणून सामाजिक सुरक्षा विभागाने मालक व दलालासह चौघांना अटक केली. या लाउन्जमधून पोलिसांनी रशियन तरुणीसह तिघींची सुटका केली आहे.
मालक दीपेश दिलीपभाई कानाबार (वय ३५, रा. मातोश्री अपार्टमेंट, सतनामीनगर), दलाल सचिन काशिनाथ सोनारकर (वय ३४, रा. संजय गांधीनगर, रामनगर), अंकित किशोर वाहने (वय १९, रा. भांडेप्लॉट) व राजेश हरिश्चंद्र गोखे (वय ३५, रा. बापू कुटीनगर झोपडपट्टी, पाचपावली) अशी अटकेतील आरोपींची नावे आहेत.
'मटा सुरक्षा कवच' या अभियानांतर्गत महालमधील दादीबाई देशमुख हिंदू मुलींच्या शाळेत झालेल्या पहिल्या सुरक्षा सभेत 'असमाजिक तत्त्वांना आवरा', असा आग्रह नागरिकांनी उपस्थित पोलिस अधिकाऱ्यांना केला होता. त्यानंतर शहर पोलिसांनी महालमधील गुन्हेगारांची झाडाझडती सुरू केली आहे. त्याअंतर्गत ही कारवाई करण्यात आली.
दीपेशचे गुजरनगरमधील गॅस गोदाम भागात देवदर्शन नावाचे टाइल्सचे दुकान आहे. गोदाम परिसरात मोकळ्या जागेत दीपेशने जुलै महिन्यात डी. के. रेस्टॉ अॅण्ड लाउन्ज सुरू केले. याठिकाणी त्याने सर्वसुविधायुक्त आठ खोल्याही तयार केल्या. या खोल्यांमध्ये तो विदेशी व परराज्यातील तरुणींकडून देहव्यापार करवून घेत होता. याबाबत सामाजिक सुरक्षा विभागाच्या पथकाला माहिती मिळाली. गुन्हेशाखेचे अतिरिक्त पोलिस आयुक्त नीलेश भरणे, उपायुक्त गजानन राजमाने, सहायक पोलिस आयुक्त सुधीर नंदनवार यांच्या मार्गदर्शनाखाली सामाजिक सुरक्षा विभागाचे पोलिस निरीक्षक किशोर पर्वते, साहाय्यक पोलिस निरीक्षक अनुपमा जगताप, साहाय्यक उपनिरीक्षक नागोराव इंगळे, नरेंद्र बघेल, विलास चौबीतकर, चंद्रकांत घागरे, सुरेखा सांडेकर, गीता शर्मा, वंदना देवकाते, छाया राऊत, सीमा बघेल यांनी डी. के. लाउन्जमध्ये छापा टाकला. पोलिसांनी चौघांना अटक करून रशियन तरुणीसह तिघींची सुटका केली. मालक व दलालाला अटक केली. त्यांच्याकडून महागडी कार, पाच मोबाइल व रोख असे एकूण आठ लाख रुपयांचे साहित्य जप्त करण्यात आले.
२० ऑगस्टला आली भारतात
रशियन तरुणी २० ऑगस्टला भारतात आली. ती दिल्ली येथे होती. दीपेश व सचिन या दोघांनी तिच्यासोबत संपर्क साधला. तिला विमानाचे तिकीट पाठविले. २६ सप्टेंबरला ती अन्य एका तरुणीसह दिल्लीहून विमानाने नागपुरात आली. तर अन्य एक तरुणी इंदूरहून नागपुरात आली. सचिन हा कुख्यात असून यापूर्वीही त्याच्याविरुद्ध चार गुन्हे दाखल आहेत.