वाघीण मृत्यू, चौकशी समिती दाखल
म.टा. वृत्तसेवा, यवतमाळ :
नरभक्षक वाघिणीच्या मृत्यूची चौकशी करण्यासाठी राज्य शासनाने स्थापन केलेली समिती सोमवारी जिल्ह्यात दाखल झाली. समितीने लोणी बेसकॅम्पला भेट देवून कागदपत्राची पाहणी केली. त्यानंतर बोराटीच्या जंगलात जाऊन वाघिणीला ठार करण्यात आलेल्या जागेची पाहणी केली.
चौकशी समितीचे अध्यक्ष प्रधान मुख्य वनसंरक्षक डॉ. एस. एच. पाटील, वन्यजीव संरक्षण संस्था मुंबईचे अध्यक्ष डॉ अनिष अंधेरिया,भारतीय वन्यजीव संस्था डेहराडूनचे डॉ. बिलाल हबीब, अपर प्रधान मुख्य वनसंरक्षक नितीन काकोडकर, व्याघ्र तज्ज्ञ तथा सेंटर फॉर वाईल्ड लाईफ स्टडीज ,बेंगळूरुचे संचालक डॉ. उल्हास कारंथ, भारतीय वन्यजीव संस्था डेहराडूनचे संशोधक डॉ. पराग निगम या चौकशी समितीच्या सदस्यांनी मोहिमेत सहभागी असलेल्या काही वनअधिकाऱ्यांशी चर्चा केली. तसेच वाघिणीला ठार करण्यापर्यंत वनविभागाने केलेले प्रयत्न जाणून घेतले घेतले. मुख्य म्हणजे वन्यजीव संरक्षण अधिनियम व राष्ट्रीय व्याघ्र संवर्धन प्राधिकारच्या सर्व नियमांचे पालन झाले काय,याची सखोल चौकशी या समितीने केली.
बछड्यानी पाडला घोड्याचा फडशा
राज्य शासनाची चौकशी समिती दौऱ्यावर आली असताना वाघिणीच्या बछड्यांनी सोमवारी एका घोड्याचा फडशा पाडला. लोणी,अंजी परिसरातील वनक्षेत्रात ही घटना घडली. टी-१ वाघिणीच्या बछड्यांचा वनविभागाकडून शोध सुरु आहे. सोमवारी या बछड्यानी लोणी,अंजी परिसरातील ६५५ वनक्षेत्रात एका घोड्याचा फडशा पडला आहे. कॅमेरामध्यी ही घटना ट्रॅप झाल्याने बछडे हळूहळू मोठी शिकार करण्यात पटाईत होत असल्याने गावकऱ्यांमध्ये पुन्हा दहशत निर्माण झाली आहे. सोमवारी वनविभागाच्या पथकाने या बछड्यांचा शोध लोणी, अंजी परिसरात घेतला मात्र बछडे पथकाच्या हाती लागले नाही.
--------------------