नागपूर दुरंतो टीसींना 'स्मार्ट' गणवेश

म.टा. विशेष प्रतिनिधी, नागपूर: नागपूर-मुंबई दुरंतो एक्स्प्रेसमध्ये एकसारख्या सुटाबुटातील कोणी दिसत असतील तर ते त्या गाडीतीली तिकीट तपासनीस आहे हे लक्षात ठेवा. कारण आता या गाडीतील टीसींचा जुना पारंपरिक गणवेश बदलून त्यांना नवा 'स्मार्ट' गणवेश देण्यात आला आहे. देशातील रेल्वेच्या प्रीमिअम गाड्यांमधील कर्मचाऱ्यांना वेगळा गणेवश असला पाहिजे, असे रेल्वे बोर्डाने ठरविले आहे. दुरंतो एक्स्प्रेस ही प्रीमिअम गाडी आहे. त्यामुळे या गाडीतीली टीसींचा गणवेश बदलला आहे. नव्या ड्रेस कोडनुसार या कर्मचाऱ्यांना पांढरा शर्ट, त्यावर कथ्थ्या रंगाचा टाय व करड्या रंगाचा सुट निर्धारित केला आहे. गाडी अधीक्षकाच्या कोटाच्या बाहीवर सोनेरी रंगाच्या तीन, तर उपअधीक्षकाच्या बाहीवर दोन पट्ट्या असतील. त्याचप्रमाणे कोटावर भारतीय रेल्वेचे चिन्ह असेल. नागपूर विभागात दुरंतो एक्स्प्रेसमध्ये २४ कर्मचारी कार्यरत आहेत. या सर्वांनाच हा नवा ड्रेस कोड लागू झाला आहे. या नव्या गणवेशासह दुरंतोची पहिली फेरी १९ डिसेंबर रोजी नागपूरवरून रवाना झाली. प्रीमिअम गाड्यांनी प्रवास करणाऱ्या प्रवाशांना आपण काही तरी खास गाडीने प्रवास करतोय असा अनुभव आला पाहिजे, या उद्देशाने काही बदल करण्यात येत आहेत. टीसींचा नवा गणवेश हा त्याचाच भाग आहे. नागपूर विभागात मंडळ रेल्वे प्रबंधक सोमेशकुमार यांच्या मार्गदर्शनात व वरिष्ठ मंडळ वाणिज्य व्यवस्थापक कृष्णाथ पाटील यांनी त्वरेने रेल्वे बोर्डाच्या धोरणाची अंमलबजावणी केली आहे.