म. टा. प्रतिनिधी, नागपूर
दिवाळीच्या काळात वाढणारे वीजचोरीचे प्रमाण बघता एसएनडीएलने आता पुन्हा एकदा वीजचोरांविरुद्धची मोहीम हाती घेतली आहे. एसएनडीएलच्या दक्षता पथकाने शहरातील असे काही भाग ज्यात वीजचोरीचे प्रमाण अधिक आहे, त्याची तपासणी सुरू केली असता गेल्या वर्षभरात या भागांमधून अंदाजे १.७ लाख युनिट, म्हणजे किमान १.२ कोटी रुपयांची वीजचोरी झाल्याची धक्कादायक माहिती पुढे आली आहे. विशेष म्हणजे, रात्री उशिरापर्यंत या भागांमधील ट्रान्सफॉर्मरच्या माध्यमातून नेमकी वीजचोरी किती झाली याची जुळवाजुळव करणे सुरू होते.
शहरातील अनेक भागात एसएनडीएलला वीजचोरीचे प्रमाण कमी करण्यात यश आले आहे. मात्र, त्यानंतरही असे काही भाग आहेत ज्यात नियमितपणे वीजचोरी होत असते. त्यातच दिवाळीच्या काळात दक्षता विभागाकडून काहीसे मवाळ धोरण स्वीकारण्यात येत असल्याने या कालावधीत वीजचोरीचे प्रमाण अधिक असते. त्यामुळे गुरुवारपासून एसएनडीएलच्या दक्षता विभागाने शहरातील एकूण १३० परिसरात वीजवितरणच व्यवस्थेची तपासणीची मोहीम सुरू केली. ही मोहीम एसएनडीएलने त्यांच्या सूत्रांकडून या भागांमध्ये वीजचोरी वाढली असल्याचे प्रमाण वाढले असल्याची माहिती मिळाल्यानंतर सुरू केली. यातील २० वस्त्यांमध्ये तर थेट मुख्य वाहिनीला टॅप करणे, मीटरला बायपास करणे, स्विचिंग उपकरण लावणे, आकडे टाकून वीजचोरी आदी प्रकारे सर्रासपणे वीजचोरी करण्यात आल्याचे दक्षता विभागाने केलेल्या तपासणीत आढळून आले.
गुरुवारी राबवण्यात आलेल्या मोहिमेत ८ प्रकरणे मुख्य प्रवाहाची वाहिनी कापण्याचे, चार प्रकरणे मीटरमध्ये छेडछाट केल्याची, तर दोन प्रकरणे स्विचिंग उपकरणाच्या साहाय्याने वीजचोरीची असल्याचे पुढे आले. त्यामुळे या भागातील तीन ट्रान्सफॉर्मरची तपासणी सुरू करण्यात आली. यात वर्षभरात या भागात अंदाजे १.७ लाख युनिट म्हणजे १.२ कोटी रुपयांची वीजचोरी झाली असल्याचा अंदाज दक्षता विभागाने व्यक्त केला आहे. विशेष म्हणजे, रात्री उशिरापर्यंत नेमकी किती वीजचोरी झाली याचा हिशेब करण्यात येत होता. इतकेच नव्हे तर या भागातून यापूर्वी अनेकदा तपासणीसाठी गेलेल्या एसएनडीएलच्या दक्षता पथकाला लोकांच्या जमावाने मारहाण केल्याने परतावे लागले आहे.
........