मराठा आरक्षण आंदोलन; पश्चिम विदर्भात कडकडीत, तर पूर्व विदर्भात संमिश्र बंद
टीम म.टा.
आरक्षणाच्या मागणीसाठी सकल मराठा कुणबी समाजातर्फे गुरुवारी 'ऑगस्ट क्रांतीदिनी' पुकारण्यात आलेल्या 'राज्यव्यापी बंद'ला पश्चिम विदर्भाच्या अमरावती, बुलडाणा, यवतमाळ, वाशीम आणि अकोला जिल्ह्यात कुठे कडकडीत तर, कुठे उत्स्फूर्त प्रतिसाद मिळाला. या जिल्ह्यांत शाळा, महाविद्यालये, बाजारपेठा, बँका, शासकीय व खासगी वाहतूक पूर्णत: बंद होती. काही रेल्वेगाड्याही रद्द करण्यात आल्या होत्या. मराठा तरुणांनी दुचाकी रॅली काढून बंद यशस्वी करण्यासाठी प्रयत्न केले. महामार्गावर रास्तारोको करण्यात आला होता. बंदोबस्तामुळे काही ठिकाणी पोलिस छावणीचे स्वरूप आले होते. तर, पूर्व विदर्भातील नागपूर ग्रामीणसह भंडारा, गोंदिया, गडचिरोली, चंद्रपूर आणि वर्धा या जिल्ह्यांत बदला संमिश्र प्रतिसाद मिळाला. बंद दरम्यान कोणतीही अनुचित घटना घडली नाही. ग्रामीण भागात मात्र बंदचा विशेष प्रभाव दिसून आला नाही.
अमरावतीत कडकडीत
मराठा समाजाला आरक्षण देण्यात यावे, या प्रमुख मागणीसाठी पुकारण्यात आलेल्या बंदला शहर व जिल्ह्यात उत्स्फूर्त प्रतिसाद मिळाला. शहर व जिल्ह्यातील सर्व शैक्षणिक संस्था बंद ठेवण्याचे आदेश जिल्हाधिकारी अभिजित बांगर यांनी बुधवारीच दिले होते. व्यापारी संघटना, चेम्बर ऑफ कॉमर्सने बंदला पाठींबा दिला होता. या पार्श्वभूमीवर गुरुवारी सकाळपासूनच शहरातील दुकाने, प्रतिष्ठाने, हॉटेल बंद होते. मुख्य बाजारपेठेपासून तर गल्लीबोळातील दुकानेही पूर्णपणे बंद होती. बँकांसह सर्वच शासकीय व खासगी संस्थांची कार्यालये ओस पडल्याचे चित्र होते. सकाळपासून मराठा समाजाचे कार्यकर्ते शहर बंद करण्यासाठी फिरत होते. राजकमल चौक येथे सकाळी १० वाजताच्या सुमारास हजारो मराठा बांधव एकत्र आले. यावेळी झालेल्या सभेत मराठा बांधवांनी सरकारवर टीकेची झोड उठवली.
...
यवतमाळात क्रांती ठोक मोर्चा
यवतमाळ : 'महाराष्ट्र बंद'ला यवतमाळ जिल्ह्यात प्रचंड प्रतिसाद मिळाला. यवतमाळसह सर्व तालुक्यांत कडकडीत बंद पाळण्यात आला. बंद दरम्यान कुठेही अनुचित प्रकार घडला नाही. यवतमाळ बसस्थानकातून सकाळपासून एकही बस सोडण्यात आली नाही. या बंदला ऑटोचालक संघटना, खासगी ट्रॅव्हल्स संघटना, व्यापारी आघाडी, सर्व शैक्षणिक संघटना, मोटारवाहक संघटनांसह विविध संघटनेचा पाठींबा असल्याने नेहमी रस्त्यावरून भरधाव वेगाने धावणाऱ्या आटोरिक्षा दिसत नव्हत्या. शहरातील सर्व बाजारपेठा बंद होत्या. जिल्हाधिकारी डॉ. राजेश देशमुख यांच्या आदेशाने शाळा-महाविद्यालये बंद ठेवण्यात आली होती. घोषणा देत युवकांच्या मोटारसायकल रॅली शहरात फिरत होत्या. घोषणाबाजी केल्यानंतर या आंदोलनात बळी गेलेल्यांना श्रद्धांजली अर्पण करण्यात आली. त्यानंतर जिल्हाधिकारी कार्यालयावर रॅली काढून जिल्हाधिकाऱ्यांना निवेदन देण्यात आले. उमरखेड, महागावसह सर्वच तालुक्यांत बंदला प्रतिसाद मिळाला. उमरखेड तालुक्यातील मार्लेगाव फाट्याजवळ आंदोलकांनी टायर पेटवून रस्त्यावर टाकल्याने काही काळ नागपूर-तुळजापूर महामार्ग बंद होता.
...
बुलडाण्यात ठिय्या
बुलडाणा : 'महाराष्ट्र बंद'ला जिल्ह्यात चांगला प्रतिसाद मिळाला. सकाळी ९ वाजता सकल मराठा समाजाच्या कार्यकर्त्यांनी हुतात्मा सिद्धेश्वर गोरे स्मारकाजवळ एकत्र जमत हुतात्म्यांना पुष्पांजली व आदरांजली वाहिली. सगळ्यांनी शांततेत आंदोलनात सहभागी व्हावे, असे आवाहन यावेळी करण्यात आले. 'एक मराठा लाख मराठा' घोषणा देत शहरातील प्रमुख मार्गावरून मोटारसायकल रॅली काढण्यात आली. त्यानंतर जयस्तंभ चौकात ठिय्या आंदोलन करण्यात आले. यात विविध राजकीय पक्षांच्या कार्यकर्त्यांनी मराठा समाजाच्या आरक्षणाची आवश्यकता मांडली. बंददरम्यान शहरातील सर्वप्रकारची वाहतूक तसेच बाजारपेठाही पूर्णत: बंद होत्या.
दोन रुग्णवाहिकांना दिला मार्ग
बुलडाणा : मराठा आरक्षणाच्या मुद्द्यावर करण्यात आलेल्या रास्ता रोको आंदोलनादरम्यान वाहनांच्या रांगांमध्ये अडकलेल्या दोन रुग्णवाहिकांना आंदोलकांनी पुढे सरसावत मार्ग मोकळा करून दिला. याशिवाय पाच खासगी वाहनांमधुन रुग्णांना नेणाऱ्यांनाही आंदोलकांनी मार्ग दिला. मेहकरातील जिजाऊ चौकात गुरुवारी सकाळपासून आंदोन सुरू होते. चक्काजाम आंदोलनामुळे रस्त्याच्या दुतर्फा वाहनांच्या रांगा लागल्या होत्या. सुमारे दोन ते तीन हजार आंदोलक या आंदोलनात सहभागी होते. अशातच एक रुग्णवाहिका जिजाऊ चौकात पोहोचली. त्यातून रुग्णाला नेण्यात येत असल्याचे काही आंदोलकांच्या लक्षात आले. त्यानंतर लगेचच मानवी साखळी तयार करून या रुग्णवाहिकेला मार्ग देण्यात आला. त्यानंतर चक्काजाम पुन्हा सुरू झाले. काही वेळानंतर दुसरी रुग्णवाहिका चौकात पोहोचली. त्यावेळीही आंदोलक रस्त्याच्या एका बाजूला झालेत व रुग्णवाहिकेला रस्ता मोकळा करून देण्यात आला. याशिवाय काही वेळेच्या अंतराने चौकात पोहोचलेल्या पाच खासगी वाहनांनाही थांबवू नका, अशी सूचना करण्यात आली. त्यातून रुग्णांना नेण्यात येत होते.
...
वर्ध्यात ५६ बसफेऱ्या रद्द
वर्धा : मराठा समाजाच्यावतीने शहरातील शिवाजी पुतळ्याजवळ धरणे आंदोलन करण्यात आले. आंदोलनादरम्यान वर्धा शहरासह हिंगणघाट, आर्वी, पुलगाव, देवळी भागात दुकाने व प्रतिष्ठाने बंद ठेवण्यात आली. वर्ध्याच्या बसस्थानकावर बसच्या प्रतीक्षेत असलेल्या प्रवाशांना अडचणींचा सामना करावा लागला. येथून सुटणाऱ्या १०६ बसफेऱ्यांपैकी केवळ ५० फेऱ्या सुरू होत्या. ग्रामीण भागातील बसवाहतुकीवर या बंदचा जास्त परिणाम दिसून आला. शाळा-महाविद्यालयांना सुटी जाहीर केल्याने विद्यार्थी घरी परततांना दिसून आले. तर काही भागात पंचायतराज कमिटीच्या चौकशीमुळे जिल्हा परिषद शाळा सुरू ठेवण्यात आल्या होत्या. तर खासगी शाळा बंद होत्या. शहरातील पेट्रोल पंप बंद ठेवण्यात आल्याने वाहनधारकांची चांगलीच अडचण झाली. बंददरम्यान कुठलीही विपरीत घटना घडली नाही.
...
गोंदिया जिल्ह्यात संमिश्र प्रतिसाद
गोंदिया : मराठा आरक्षणाच्या मागणीसाठी सकल मराठा क्रांती मोर्चाच्यावतीने आयोजित बंदला संमिश्र प्रतिसाद मिळाला. गोंदियाव्यतिरिक्त जिल्ह्यात कुठेही बंद पाळण्यात आला नाही. शहरातील शाळा संचालकांनी आधीच शाळेला सुट्टी दिल्याने शाळा बंद होत्या. सकाळी ११ वाजतापर्यंत बंद असलेली मुख्य बाजारपेठ नंतर हळूहळू सुरू झाली. एसटी बससेवा व खासगी वाहतुकही सुरळीतपणे सुरू होती. या बंदला शिवसेना, काँग्रेस व मनसेने पाठिंबा जाहीर केला होता. आंदोलकानी मोर्चा उपविभागीय अधिकारी कार्यालयावर नेल्यानंतर उपविभागीय अधिकारी अनंत वालस्कर यांना आपल्या मांगण्याचे निवेदन सादर केले.
....
भंडाऱ्यात बंद बेअसर; एसटी प्रभावित
भंडारा : मराठा आरक्षणाच्या मागणीसाठी गुरुवारी पुकारण्यात आलेल्या महाराष्ट्र बंदला भंडारा शहर व जिल्ह्यात प्रतिसाद मिळाला नाही. बाजारपेठा, शाळा, महाविद्यालये, खासगी कंपन्यांमधील कामकाजही सुरळीत सुरू होते. फक्त नागपूरमार्गावरील एसटी बसेसची वाहतूक प्रभावित झाली होती. जिल्ह्यात या बंदचा फारसा परिणाम जाणवला नाही. एरव्ही दर तीन ते पाच मिनीटांनी नागपूरला जाणारी एसटी आज तब्बल तासाभराच्या फरकाने सोडण्यात आली. त्यामुळे प्रवाशांना काहीसा फटका बसला. काही प्रवाशांनी खासगी वाहनांनी प्रवास करण्यास पसंती दिली. याशिवाय, बंदचा म्हणावा तसा परिणाम दिसून आला नाही.
...
चंद्रपुरातही बस सेवेवर परिणाम
चंद्रपूर: आरक्षणाच्या मागणीसाठीच्या 'महाराष्ट्र बंद'च्या पार्श्वभूमीवर प्रतिबंधात्मक उपाय म्हणून जिल्ह्याच्या काही भागात जाणारी एसटी बससेवा बंद ठेवण्यात आली होती. त्याचा प्रवाशांना फटका बसला. काही संघटनांतर्फे राज्यभरात मोर्चे व धरणे आंदोलनं करण्यात येत असल्याच्या पार्श्वभूमीवर प्रतिबंधात्मक उपाय म्हणून नागपूर, अमरावती ,यवतमाळ, वर्धा जिल्ह्यात जाणारी एसटी बससेवा बंद ठेवण्यात आली होती. तर, जिल्ह्यांतर्गत बससेवा सुरू ठेवण्यात आली होती. शहरासह जिल्ह्यातील शाळा-महाविद्यालये, दुकाने, बाजारपेठा सुरळीत सुरू होत्या.