जनसंवाद विद्यार्थ्यांची मोहीम; सुवर्ण महोत्सवी वर्षानिमित्त विविध उपक्रम
म.टा. प्रतिनिधी, नागपूर
सोशल मीडियामुळे आज जग एक खेडं बनलं आहे. प्रत्येकाच्या मोबाइलवर क्षणात सर्व माहिती उपलब्ध होऊ लागली आहे. मात्र सोशल मीडियावरील अनेक बातम्यांमध्ये सत्य कमी आणि फेक गोष्टींचा भरणा वाढला आहे. हाच धागा पकडून राष्ट्रसंत तुकडोजी महाराज नागपूर विद्यापीठातील जनसंवाद विद्यार्थ्यांनी फेक न्यूजपासून दूर राहण्याचा सल्ला देणाऱ्या मोहिमेचे सादरीकरण केले. निमित्त होते राष्ट्रसंत तुकडोजी महाराज नागपूर विद्यापीठातील जनसंवाद विभागाच्या सुवर्णमहोत्सवी वर्षाचे.
सुवर्ण महोत्सवी वर्षानिमित्त जनसंवाद विभागाच्या सभागृहात माजी विद्यार्थ्यांचा रविवारी मेळावा घेण्यात आला. यावेळी महाराष्ट्र टाइम्सचे निवासी संपादक श्रीपाद अपराजित, ज्येष्ठ पत्रकार शैलेश पांडे, मुंबई प्रेस क्लबचे सचिव धर्मेंद्र जोरे, जनसंवाद विभाग प्रमुख डॉ. मोइज हक, डॉ. वेदप्रकाश मिश्रा, चंद्रमोहन पुप्पाला यांच्यासह शेकडो माजी विद्यार्थी उपस्थित होते.
'देख भाई फेक' या नावाने जनसंवाद विभागाच्या विद्यार्थ्यांनी मोहीम हाती घेतली आहे. १५ हजारपेक्षा अधिक लोकांपर्यंत या मोहिमेच्या माध्यमातून जनजागृती करण्यात आली. फेक न्यूज कशी ओळखावी याबाबतच्या विविध सूचनाही जनसंवाद विभागाचे विद्यार्थी सांगत असतात. सामाजिक दायित्व ठेऊन खरी पत्रकारिता काय असते याचे सादरीकरण यावेळी करण्यात आले.
फूल टू धम्माल...
कधीकाळी एका बाकावर बसून शिक्षण घेतलेले आणि आज विविध क्षेत्रात उल्लेखनीय काम करणारे माजी विद्यार्थी मेळाव्यात एकत्र आले. जुन्या मित्रांची भेट झाल्याचा आनंद सर्वांच्या चेहऱ्यावर होता. मग काय धम्माल करायचीच. जुन्या हिंदी गाण्यांचे खास सादरीकरण यावेळी विद्यार्थ्यांनी केले. विविध आठवणींना यावेळी उजाळा देण्यात आला. 'मी जनसंवाद विभाग बोलतोय' ही यशस्वी विद्यार्थ्यांची चित्रफित दाखविण्यात आली. मेळाव्याच्या आठवणी कायमस्वरूपी स्मरणात राहाव्या यासाठी त्वरित छायाचित्र काढून त्याची प्रिंट उपलब्ध करून देण्यात आली. जनसंवाद विभागाचा ५० वर्षांचा प्रवास दाखविणारी २५ मिनिटांची चित्रफित यावेळी दाखविण्यात आली.
----------------
कॅप्शन : राष्ट्रसंत तुकडोजी महाराज नागपूर विद्यापीठातील जनसंवाद विभागाच्या सुवर्णमहोत्सवी वर्षानिमित्त आयोजित कार्यक्रमात विद्यार्थ्यांनी विविध कार्यक्रम सादर केले.