नागपूर : कोळसा घोटाळा प्रकरणात अंमलबजावणी संचालनालयाने (ईडी) बुधवारी येथील सुनील हायटेक इंजिनीअरिंग लिमिटेड कंपनीवर छापा टाकून २५ कोटी ४४ लाख रुपये जप्त केले. रत्नाकर गुट्टे व सुनील गुट्टे या कंपनीचे संचालक आहेत. ईडीच्या या कारवाईमुळे उपराजधानीत प्रचंड खळबळ उडाली आहे. ईडीने दिलेल्या माहितीनुसार, २०१०मध्ये सुनील हायटेक कंपनीने महाराष्ट्र राज्य खनिज विकास महामंडळाच्या (एमएसएमसीएल) वर्ध्यातील मरकी झरी-जामणी अडकोली येथील खाण मिळवली होती. तत्पूर्वी एमएसएमसीएलचे व्यवस्थापकीय संचालक डी. जी. फिलिप यांनी सुनील हायटेक कंपनीला तीन वर्षांचा अनुभव नसल्याने अपात्र ठरविले होते. त्यानंतरही सुनील हायटेकला खाण मिळाली होती. कोळसा घोटाळ्याच्या तपासादरम्यान ही बाब समोर आली होती. ईडीने नागपुरात केलेली अलीकडच्या काळातील ही तिसरी कारवाई होय.
सुनील हायटेकवर ईडीचा छापा, २५ कोटींची रोख जप्त
कोळसा घोटाळा प्रकरणात अंमलबजावणी संचालनालयाने (ईडी) बुधवारी येथील सुनील हायटेक इंजिनीअरिंग लिमिटेड कंपनीवर छापा टाकून २५ कोटी ४४ लाख रुपये जप्त केले.
Maharashtra Times 15 Mar 2018, 3:41 pm