स्मशानभूमित घेतले गाडून!

बुलडाणा : दुष्काळग्रस्त शेतकऱ्यांना शासनाने हेक्टरी ५० हजार रुपये नुकसान भरपाई द्यावी, या मागणीसाठी स्वाभिमानी शेतकरी संघटनेच्या कार्यकर्त्यांनी तालुक्यातील निरोड येथील स्मशानभूमित स्वत:ला गळ्यापर्यंत गाडून घेत आत्मक्लेश आंदोलन केले. १५ जणांचा या आंदोलनात प्रत्यक्ष सहभाग होता. या आंदोलनामुळे प्रशासनात एकच खळबळ उडाली. दरम्यान पोलिसांनी घटनास्थळी धाव घेत या आंदोलकांना बाहेर काढून उपचारार्थ रुग्णालयात दाखल केले.

शासनाने दुष्काळ घोषीत केला असला तरी दुष्काळाच्या उपाययोजनांची अंमलबजावणी होत नाही. दुष्काळाच्या परिस्थिती मध्ये कुटुंबाचा उदारनिर्वाह कसा चालवावा या चिंतेत शेतकरी आहेत. त्यामुळे शासनाने शेतकऱ्यांना हेक्टरी ५० हजार रुपये नुकसान भरपाई द्यावी, या मागणीसाठी स्वाभिमानी शेतकरी संघटनेच्या कार्यकर्त्यांनी संग्रामपूर तालुक्यातील निरोड येथील स्मशानभूमित सकाळी पाच वाजतापासून स्वत:ला गाडून घेत आत्मक्लेश आंदोलन सुरु केले. स्वाभिमानीचे युवा जिल्हाध्यक्ष प्रशांत डिक्कर, तालुकाध्यक्ष उज्ज्वल चोपडे, सुनील अस्वार, विलास तराळे, योगेश मुरुख, शिवा पवार, गोपाल वसतकार, प्रकाश भगत, संजय बोरवार, सुखदेव अमझरे, रमेश नांदने, सागर खानझोड, सागर डोंगरे, दादाराव जाधव, सोपान कुरवाळे यांच्यासह इतर कार्यकर्त्यांनी स्वत:ला गाडून घेतले होते. विशेष म्हणजे प्रशासनाला या आंदोलनाची साधी कल्पनाही त्यांनी लागू दिली नाही. हळूहळू आंदोलनस्थळी शेतकऱ्यांची संख्या वाढू लागली. प्रचंड नारेबाजीकरुन शेतकरी व कार्यकर्त्यांनी परिसर दणाणून सोडला. दरम्यान प्रशासनाला या आंदोलनाची माहिती मिळताच एकच खळबळ उडाली. पोलिसांसह महसूल व कृषी विभागाच्या अधिकाऱ्यांनी घटनास्थळी धाव घेतली. पोलिसांनी मध्यस्तीकरत आंदोलकांना बाहेर काढले. त्यांची प्रकृती खालावल्याने त्यांना तातडीने रुग्णालयात दाखल करण्यात आले.