स्विसच्या इंजिनीअरचे सायकलने भारतभ्रमण

म. टा. प्रतिनिधी, नागपूर

आपल्याकडे वयाच्या विसाव्या वर्षातील मुले स्वत:हून कुठलेही सकारात्मक धाडस करायला सहसा धजावत नाहीत. चौकोनी कुटुंबात जर मुलगा इंजिनीअर असेल तर आई-वडीलच त्याला असे धाडस करू देत नाहीत. शिक्षणानंतर मुलालाही गलेलठ्ठ पगार खुणावू लागतो. घरातही कधी एकदा त्याला बोहल्यावर चढवू, अशी लगीनघाई सुरू होते. नव्या दमाचे तरुण रक्तही मग थंड होत जाते. पण, कोणताही भपकेबाजपणा न दाखवता स्वबळावर धाडस करत वेगळी वाट शोधणरे क्वचित असतात. असाच एक जेमतेम विशीतला मेकॅनिकल इंजिनीअर चक्क भारतभ्रमण करतोय. तोही सायकलवरून.

आडवळणावरचा रस्ता धरणारा हा तरुण आहे, जिओम बर्नी. निसर्गाने भरभरून दान पदरात टाकलेल्या स्वित्झर्लंडच्या विद्यापीठातून मेकॅनिकल इंजिनीअरिंगची पदवी मिळविलेला जिओम अवघ्या विशीतला तरुण. चार हजार किलोमीटरचे अंतर तुडवत तो मंगळवारी नागपुरात पोहोचला. जिओमने दोन वर्षांपूर्वी शिक्षण पूर्ण केले. त्यानंतर वर्षभर त्याने एका कंपनीत नोकरीही केली. पण, रोजच्या कामात त्याचे मन रमेना. जॉब सुरू करून वर्षही होत नाही तोच त्याने नोकरीचा राजीनामा दिला आणि सायकल घेऊन थेट भारत गाठले.
मुंबईत दाखल झाल्यानंतर १५ नोव्हेंबर २०१७पासून त्याने सायकलरून भारतभ्रमणाला सुरूवात केली. महाराष्ट्रीय तरुण ज्या वयात आपले घर सोडायला धजावत नाहीत, तिथे जिओम भाषेचा कसलाही थांगपत्ता नसताना सायकवरून रोज नवनव्या प्रदेशांमध्ये भ्रमंती करतोय. मुंबई येथून त्याने आतापर्यंत गोवा, कर्नाटक, तमिळनाडू, आंध्र प्रदेश, तेलंगणमार्गे नागपूर असा ४ हजार ३०० कि.मी.चा प्रवास पूर्ण केला आहे. पुढील मार्गात तो मध्य प्रदेश, छत्तीसगड, उत्तर प्रदेश, राजस्थान, दिल्ली, पंजाब, उत्तराखंडमार्गे नेपाळकडे रवाना होणार आहे.