भंडारा
भंडाऱ्यातील अभयारण्यात आज सकाळी आणखी एक वाघ मृतावस्थेत आढळल्याची धक्कादायक घटना निदर्शनास आली आहे. सकाळच्या सुमारास वन विभागाच्या अधिकाऱ्यांनी शोधमोहीम हाती घेतली होती. यावेळी त्यांना हा वाघ मृतावस्थेत आढळून आला आहे. या वाघाची ओळख पटली असून ती टी४ वाघीण असल्याची माहिती समोर आली आहे.
आज सकाळी वन विभागाच्या अधिकाऱ्यांना वाघ मृतावस्थेत आढळला. वळच या ठिकाणी एक डुक्करही मृतावस्थेत आढळले आहे. काल उमरेड-पवनी-कऱ्हांडला अभयारण्यातील 'चार्जर' या वाघाचा मृत्यू झाल्याची घटना उघडकीस आली. रविवारी सकाळच्या सफारीदरम्यान त्याचा मृतदेह दिसून आला. याच अभयारण्यातील प्रसिद्ध 'जय' वाघापासून 'चार्जर'चा जन्म झाला होता. विषबाधेमुळे त्याचा मृत्यू झाला असावा, असा अंदाज व्यक्त करण्यात आला होता.
अभयारण्यातील पवनी वनपरिक्षेत्रातील चिंचगाव बीटमधील कंपार्टमेंट क्रमांक २१५ येथे हा त्याचा मृतदेह आढळून आला. त्याच ठिकाणी या वाघावर अंत्यसंस्कार करण्यात आले. २१० किलो वजनाच्या या वाघाचा मध्यरात्री १२ वाजताच्या सुमारास मृत्यू झाला असावा, असा अंदाज आहे. त्याच्या तोंडातून रक्त निघत होते. त्यामुळे त्याच्यावर विषप्रयोग करण्यात आला असावा, अशी शक्यता व्यक्त होत करण्यात आली होती.