ताडोब्यातील ४७ शाळांमध्ये ई-लर्निंग

चंद्रपूर : वनावरील ताण कमी करण्यासाठी स्थानिकांना पर्यायी व्यवस्था उपलब्ध करून देणे हे डॉ. श्यामाप्रसाद मुखर्जी जन-वन विकास योजनेचे उद्दिष्ट आहे. त्या अंतर्गत ताडोब्याच्या बफर क्षेत्रामधील ४७ गावांतील शाळांमध्ये ई-लर्निंग सुरू होणार आहे. या शाळांमधील ई-लर्निंगचे तसेच बोट सफारीचे उद्‍घाटन वित्त, नियोजन व वनमंत्री सुधीर मुनगंटीवार यांच्या हस्ते आज, गुरुवारी होणार आहे.

ताडोबा अंधारी व्याघ्र प्रकल्पातील बफर क्षेत्रात एकूण ७९ गावांचा समावेश आहे. सदर गावे हे दुर्गम भागात वसलेले असून चाहूबाजूने वनांनी व्यापलेले आहे. अशा या दुर्गम भागातील आदिवासींना उच्च दर्जाच्या शिक्षणाची सोय उपलब्ध व्हावी, या मुलांना शिक्षणाच्या माध्यमातून शहरी मुला-मुलींच्या बरोबरीने प्रगतीचे नवीन मार्ग खुले व्हावे या दृष्टिकोनातून ताडोबा अंधारी व्याघ्र प्रकल्प अंतर्गत बफर क्षेत्रातील शाळेमध्ये ई-लर्निग संचाचा पुरवठा करण्यात आला आहे. ४७ शाळांतील ९९ वर्ग खोल्यांमध्ये ई-लर्निगचा संच लावण्यात आला आहे. सुरुवातीला मोहर्ली येथे उद्‍घाटन करण्यात आल्यानंतर मुधोली, भामटेकळी व आगरझरी येथील शाळांमध्ये वनमंत्री मुनगंटीवार यांच्या उपस्थितीत कार्यक्रम होईल. तर इतर गावांतील शाळांमध्ये प्रतिष्ठित नागरिकांच्या उपस्थितीत उद्‍घाटन होणार आहे, अशी माहिती ताडोबा अंधारी व्याघ्र प्रकल्पाचे उपसंचालक (बफर) गजेंद्र नरवणे यांनी दिली.