उच्च न्यायालयाचे आदेश
म. टा. विशेष प्रतिनिधी, नागपूर
आयुर्वेद पदवीसाठी नागपुरातील केंद्रात झालेल्या प्रवेश परीक्षेतील गैरप्रकाराची दखल घेत सदर कोर्सची फेरपरीक्षा १५ दिवसांत घेण्याचा आदेश मुंबई हायकोर्टाच्या नागपूर खंडपीठाने दिला. सदर फेरपरीक्षा केवळ नागपुरातच होणार असून, उर्वरित केंद्रातील परीक्षा निकाल जाहीर करावा, असेही आदेशात नमूद केले आहे.
नागपुरातील नेक्सटेक टेक्नॉलॉजी कंपनीच्या परीक्षा केंद्रात सामूहिक कॉपी झाल्याचा आरोप करणाऱ्या याचिका विद्यार्थ्यांनी हायकोर्टात दाखल केल्या. तेव्हा हायकोर्टाने नेक्सटेक टेक्नॉलॉजी कॉम्पुटर लॅबमध्ये झालेल्या आयुर्वेद पदव्युत्तर परीक्षेतील सीसीटीव्ही फुटेज दाखल करण्याचा आदेश दिला होता. सदर फुटेज बघितल्यानंतर विद्यार्थ्यांनी केलेल्या आरोपांवर उत्तर सादर करण्याचा आदेश न्यायालयाने दिला होता. तेव्हा आयुर्वेद संस्था आणि परीक्षा केंद्राने विद्यार्थ्यांनी केलेले आरोप फेटाळून लावले होते.
दरम्यान, खंडपीठाने फुटेज तपासले तेव्हा त्यात केवळ दोनच कॅमेरांनी केलेले रेकॉर्डिंग आढळून आले. त्यात संपूर्ण परीक्षा हॉल चित्रित झालेला नाही. त्यामुळे विद्यार्थ्यांनी व्यक्त केलेला संशय योग्य मानून फेरपरीक्षा घेण्यात यावी काय, असा सवाल खंडपीठाने केंद्र सरकारला केला आहे होता. केंद्र सरकारने नागपूर केंद्रात फेरपरीक्षा घेण्यास हरकत नसल्याचे कोर्टाला कळविले. तेव्हा आगामी १५ दिवसात फेरपरीक्षा घेण्यात यावी, तोवर नागपूर वगळता इतर केंद्रातील परीक्षेचा निकाल जाहीर करण्यात यावा. परंतु, प्रवेश प्रक्रिया नागपूर केंद्रातील फेरपरीक्षेच्या निकालानंतरच घेण्यात यावी, असा आदेश न्यायालयाने दिला आहे.
आयुर्वेदसह इतर तीन अभ्यासक्रमांच्या प्रवेशासाठी २४ जून २०१८ रोजी प्रवेश परीक्षा घेण्यात आली होती. कामठी रोडवरील नेक्सटेक टेक्नॉलॉजी कंपनीच्या कम्पुटर लॅबमध्ये या परीक्षेचे केंद्र देण्यात आले होते. तिथे सामूहिक कॉपी झाल्याचा दावा करणारी याचिका किशोर सोनवणे व इतर १८ विद्यार्थ्यांनी केला. सदर याचिकेतील विद्यार्थी हे केवळ आयुर्वेद अभ्यासक्रमाशी निगडीत आहेत. त्यामुळे त्यांचा वाद हा केवळ आयुर्वेदच्या प्रवेशापुरता मर्यादित आहे. त्यास्थितीत युनानी, सिद्धा व होमिओपॅथी या तीन कोर्सेसचे प्रवेश करण्याची परवानगी देण्यात आली. याचिकाकर्त्यांच्या वतीने अॅड. अनुप ढोरे यांनी बाजू मांडली.
.....