म.टा. विशेष प्रतिनिधी, नागपूर
तब्बल ५६८ कोटींचा मालमत्ता कर थकीत असतानाही मनपाचा कर वसुलीचा आलेख गेल्या पाच वर्षांपासून खालावतच आहे. आता थकबाकीदारांना कुरवाळण्यासाठी पुन्हा 'वन टाइम सेटलमेंट' योजना राबविण्याचा निर्णय कर आकारणी व कर संलकन समितीने घेतला आहे. याबाबत महापौर, स्थायी समिती सभापती व आयुक्तांना समिती विनंती करणार आहे.
समितीचे सभापती महेंद्र धनविजय यांनी गेल्या दोन वर्षांत मालमत्ता कर वसुली फार कमी असल्याकडे लक्ष वेधत ही योजना पुन्हा राबविण्याची इच्छा दर्शविली. यापूर्वी दोनदा ही योजना आणली गेली होती. मात्र त्याला थकबाकीदारांनी अत्यल्प प्रतिसाद दिला होता. या योजनेमुळे प्रामाणिक करदात्यांनी नाराजीही व्यक्त केली होती. त्यानंतरही ही योजना पुन्हा आणली जात आहे. थकबाकी वसूल करण्यासाठी शास्तीमध्येही सूट देण्याचेही प्रस्तावित केले आहे. यासाठी १६ फेब्रुवारीपासून ३१ मार्चपर्यंत प्रत्येक रविवारी सकाळी १० ते दुपारी २ पर्यंत वॉर्डनिहाय मालमत्ता कर वसुली शिबिर घेण्याचे ठरले आहे.
आयुक्तांकडून नकार
कर समितीने शास्तीमध्ये सूट देण्याचा निर्णय घेतला असताना मनपा आयुक्त तुकाराम मुंढे यांनी मात्र शास्ती सूट देण्यास नकार दिल्याची माहिती आहे. त्यामुळे प्रस्तावित 'सेटलमेंट' योजनाही अडचणीत येण्याची शक्यता नाकारता येत नाही.