म.टा. प्रतिनिधी, नागपूर
स्वातंत्र्यदिनाच्या पूर्वसंध्येला नागपूर पोलिस दलातील तीन सहायक पोलिस उपनिरीक्षकांना राष्ट्रपती पोलिस पदक जाहीर झाले आहे. यात विश्वास श्यामराव ठाकरे, नितीन भास्करराव शिवलकर व अशोक सोमाजी तिडके यांचा समावेश आहे. शहर पोलिस दलाच्या इतिहासात पहिल्यांदाच एकाचवेळी तीन पोलिस कर्मचाऱ्यांना हे पदक जाहीर झाले. तिघांचेही पोलिस आयुक्त डॉ. भूषणकुमार उपाध्याय व पोलिस सहआयुक्त रवींद्र कदम यांनी अभिनंदन केले.
ठाकरे हे १०८८ मध्ये पोलिस दलात दाखल झाले. त्यांना आतापर्यंत २८२ बक्षीस मिळाले. २०१२मध्ये त्यांना पोलिस महासंचालकांचे सन्मानचिन्ह मिळाले. तिडके हे १९८७पासून पोलिस दलात सेवा देत आहेत. तिडके यांना ५२८ बक्षिसे प्राप्त झाली. गुन्हेशाखेत कार्यरत तिडके यांनी १३१ गुन्हेगारांच्या तडीपारीचे, ३६ गुंडाच्या एमपीडीएचे प्रस्ताव तयार केले. उल्लेखनीय कार्याबाबत २०१५मध्ये तिडके यांना पोलिस महासंचालकांचे सन्मानचिन्हही मिळाले. १९८७मध्ये पोलिस दलात दाखल झालेले शिवलकर यांनी २२२ बक्षीस प्राप्त केले. त्यांना २९१७ मध्ये पोलिस महासंचालकांचे सन्मानचिन्ह मिळाले. पोलिस बंदोबस्त लावण्यात त्यांचा हातखंडा आहे.
ज्योतिकुमार सतिजा यांना पोलिस पदक
नागपूर : आरपीएफचे डीआयजी ज्योतिकुमार सतिजा यांना स्वातंत्र्यदिनानिमित्त भारतीय पोलिस पदक जाहीर झाले आहे.
आयआयटी कानपूर येथून बी.टेक. झालेले सतिजा काही महिन्यांपर्यंत मध्य रेल्वेच्या नागपूर विभागात सुरक्षा आयुक्त होते. सध्या ते लखनौ आरपीएफचे डीआयजी आहेत. गेल्या चार वर्षांत त्यांनी ज्याप्रकारे आरपीएफ जवान, अधिकारी यांना सकारात्मकतेसाठी प्रोत्साहन दिले व आरपीएफची चांगली प्रतिमा निर्माण केली, त्याबद्दल त्यांचा हा गौरव होत आहे. रेल्वेस्थानकावर किंवा गाडीत भरकटलेल्या मुलांचे समुपदेशन करून पालकांपर्यंत पोहोचविणे, हरवलेल्या वस्तूंचा शोध घेऊन प्रवाशांना परत करणे, गांजा, मद्य, ई-तिकीट यांच्या तस्करीविरुद्ध धडाकेबाज कारवाई, अवैध विक्रेतेमुक्त रेल्वे स्थानक ही सतिजा यांच्या कामकाजाची वैशिष्ट्ये आहेत. नागपुरात कॅन्सर रुग्णांना आरपीएफतर्फे दर शनिवारी भोजन पुरविण्याचा उपक्रम सतिजा यांनी राबविला. ध्वनिप्रदूषण टाळण्यासाठी त्यांनी नागपूर शहरात आरपीएफतर्फे 'नो हॉर्न मिशन' राबविले होते. आज देशातील अनेक रेल्वेस्थानकांवर शंभर फूट उंचीचा तिरंगा ध्वज फडकताना दिसतो. ही कल्पना सतिजा यांचीच होती हे विशेष.