म. टा. प्रतिनिधी, नागपूर
कोणत्या ना कोणत्या घटनेमुळे चौकशांचे शुक्लकाष्ठ कोराडी मार्गावरील प्रादेशिक मनोरुग्णालयाच्या मागे लागते. कधी येथे रुग्णांना होणारी मारहाण, छळ, महिला रुग्णांचे शोषण, कधी खुनाच्या घटनांमुळे हे रुग्णालय सतत वादाच्या केंद्रस्थानी येत आहे. गेल्या चार वर्षांत या घटना सातत्याने प्रकाशात येत असल्याने त्याला आळा घालण्यासाठी आता प्रशासनाने रामबाण औषध शोधले आहे.
रुग्ण आणि कर्मचाऱ्यांच्या हालचालीवर लक्ष ठेवण्यासाठी परिसरात ५८ सीसीटीव्ही कॅमेऱ्यांचा वॉच राहणार आहे. हे कॅमेरे रुग्णालय आणि परिसरात घडलेल्या घटना टिपण्यास मदत करणार आहेत. गेल्या काही महिन्यांपासून मनोरुग्णालयातील रुग्णांचे मृत्यू वाढले असून, रुग्ण पळण्याच्या घटनांमध्येही वाढ झाली आहे. त्यामुळे प्रशासन सतत वादात अडकत होते. प्रशासनाने काही प्रकरणांची चौकशीही सुरू केली आहे. त्यामुळे रुग्णांवर लक्ष ठेवण्यासाठी प्रशासनाने रुग्णालयाचे दोन्ही प्रवेशद्वार, महिला व पुरुषांचे वॉर्ड, स्वयंपाकगृह, बाह्यरुग्ण विभाग असे मिळून ५८ कॅमेरे लावले आहेत. मनोरुग्णालयात चालू वर्षात आतापर्यंत विविध कारणांनी जवळजवळ १३ रुग्णांचा मृत्यू झाला आहे. मृत्यू वाढत असल्याने शासनाने याबाबत स्पष्टीकरण मागितले होते. त्यावर आरोग्य संचालकांनी असमाधान व्यक्त केले होते.
मनोरुग्ण अनेकदा हिंसक होतात. कर्मचाऱ्यांचा दोष नसताना त्यांच्यावर ठपका ठेवला जातो. सीसीटीव्ही कॅमेऱ्यामुळे सत्यता पडताळता येईल. तसेच रुग्णांच्या हालचालींवर नजर ठेवता येईल, असा दुजोरा प्रभारी वैद्यकीय अधीक्षक डॉ. नितीन गुल्हाने यांनी दिला.