म. टा. विशेष प्रतिनिधी, नागपूर
भंडारा महामार्गावरील कापसी मोहगाव येथील सुरुची मसालेंच्या दोन कोल्ड स्टोरेजला लागलेली आग अद्यापही धुमसत आहे. तीन दिवसांपूर्वी सोमवारला ही आग लागली होती. बुधवारी, दुसऱ्या कोल्ड स्टोरेजमधील सामग्री पूर्ण जळाली. परंतु, आतमधील काही भागातील आग कायम आहे. तर, पहिल्या पाच माळयांच्या स्टोरेजची आग आता पाचव्या माळयावरून चौथ्या व तिसऱ्या माळयावर पसरली आहे. मंगळवारला या घटनेत जखमी झालेल्या अग्निशमन दलातील चौघांपैकी तिघांवर प्राथमिक उपचार करून सुटी देण्यात आली. तर, आगीत भाजलेल्या एकावर क्रीम्स रुग्णालयात शस्त्रक्रिया करण्यात आली. दरम्यान, दोन्ही स्टोरेजमधील मसाल्याची सामग्री जळाल्यानंतर इमारत कोसळू शकते, अशी शक्यता व्यक्त करण्यात येत आहे.
मिरची भरलेल्या पाच माळ्यांच्या कोल्ड स्टोरेजची आग किमान महिनाभर राहील. आता ही आग पसरत खालच्या माळयापर्यंत येत आहे. सर्वात आधी पाचव्या माळ्यावर ही आग होती. आता ती चौथ्या व तिसऱ्या माळ्यावर आली आहे. या स्टोरेजमध्ये आतमध्ये जाऊन पथकाला आग विझविता येत नाही. त्यामुळे बाहेरूनच पाण्याचा मारा करावा लागत आहे. मात्र, हे पाणी सामग्रीपर्यंत जात नसल्याने आग भडकतच आहे. ही आग विझण्याची वा नियंत्रणात येण्याची शक्यता कमी आहे. त्यामुळे या स्टोरेजवर सातत्याने पाण्याचा मारा करावा लागतो आहे. या स्टोरेजच्या इमारतीला आता भेगा पडल्या आहे. आत इमारत बांधकामासाठी वापरण्यात येणाऱ्या स्टील रॉड्स हळूहळू वितळत आहे. त्यामुळे पाच माळ्यांचे हे स्टोरेज कोसळेल. परंतु, त्याला बराच कालावधी लागेल. या स्टोरेजच्या सर्व माळ्यांत मिरचीचे पोते खचाखच भरलेले आहेत. ते आता काढता येणे अशक्य आहे. काहीच भागातील मिरचीचे पोते काढण्यात आले. त्यामुळे आता स्टोरेजची ही इमारत पुढे कामात येणार नाही. ती आतमधील मटेरीयल जळून खाक झाल्यावर आणि इमारतीत लागलेले रॉड्स वितळल्यावर कोसळेल असे मानले गेले आहे.
तर, शेजारच्या चार माळ्यांच्या स्टोरेजची भिंत व पिलर तसेच कॉलम कोसळण्याची प्रक्रिया सुरू झाली आहे. या स्टोरेजमध्ये मसाले, मिरे व अन्य सामग्रीचा स्टॉक करून ठेवण्यात आला होता. यातील काही माल काढण्यात यश आले. परंतु, आग पसरल्याने इमारतीचे सीलिंग कोसळले. यातच काल अग्निशमन पथकातील जवान जखमी झाले होते. ही इमारतही पुढे नव्यानेच उभारावी लागणार आहे.
दरम्यान, बुधवारी दुपारी दोन्ही कोल्ड स्टोरेजमधील आग पुन्हा भडकली. या आगीचे लोळ दूरवरून दिसत होते. मिरची जळाल्यानंतर सुटलेला गंधांमुळे आसपासच्या परिसरात खोकल्याचा ठसक्यांचा त्रास वाढला आहे. अशा अडचणीत अग्निशमन विभागाचे कर्मचारी काम करीत आहेत, असे उपमुख्य अग्निशमन अधिकारी बी. पी. चंदनखेडे यांनी सांगितले.
अग्निशमन जवानांची कसोटी
अग्निशमन पथकातील जवानांना ही आग विझविताना प्रचंड मेहनत घ्यावी लागत आहे. टीटीएलचा वापर करून उंचावरून स्टोरेजमध्ये पाण्याचा मारा करावा लागतो आहे. अग्निशमन विभागाच्या शहरातील बहुतांश केंद्रातील कर्मचारी आळीपाळीने घटनास्थळी कर्तव्य बजावत आहेत. आगीत भाजलेला चालक बिनेकर हा दुसऱ्या कोल्ड स्टोरेजच्या आतमध्ये गेला होता. अचानक इमारतीचा एक भाग खाली पडला, यात बिनेकर फसला. त्यामुळे त्यांची त्वचा भाजली. बुधवारी त्यांच्यावर शस्त्रक्रिया करण्यात आली आहे. त्यांना आणखी दोन दिवस रुग्णालयात ठेवण्यात येणार आहे.
........